चायना मांजापासून नगरकरांचा जीव वाचविण्यासाठी पतंगमुक्त संक्रांत साजरी करावी, असे आवाहन हरियाली संस्थेचे अध्यक्ष सुरेश खामकर यांनी केले आहे.
संक्रांतीनिमित्त नगर शहरात मोठ्या प्रमाणात पतंगोत्सव साजरा केला जातो. पतंग उडविण्यासाठी बहुतांशी जण चायना मांजाचा वापर करतात. हा मांजा सहजासहजी तुटत नाही. पतंग उडविल्यानंतर हा मांजा रस्त्यावर, इमारती, घरे, विजेचे खांब व झांडांवर अडकून राहतो. वाहन चालविताना हा मांजा अटकून नगर शहरात अनेक जण गंभीर जखमी झाले आहेत. तसेच पक्ष्यांचा जीव गेला आहे. पोलिसांनी मागील आठ दिवसांत शहरात विविध दुकानांवर छापे टाकून चायना मांजा जप्त करत गुन्हे दाखल केले आहेत. चायना मांजा विक्री करताना आढळल्यास त्यांच्यावर तर कारवाई होणारच आहे, मात्र पतंग उडविताना कोणाच्या हातात चायना मांजा दिसला तर त्याच्यावरही थेट गुन्हा दाखल करण्यात येणार आहे.
----------------------------------
पालकांनीही घ्यावी दक्षता
पालकांनी मुलांना पतंग उडविण्यासाठी साधा दोरा द्यावा. चायना मांजा असल्यास काढून घ्यावा. दोऱ्याची लांबी कमी द्यावी.
घराच्या छतावरच गर्दी करू देऊ नये.
वापरताल चायना मांजा तर होईल तीन महिन्यांचा कारावास
चायना मांजाची विक्री व वापर करताना आढळून आलेल्यांवर भारतीय दंड विधान कलम १८८ व ३३६ सह पर्यावरण संरक्षण अधिनियम चे कलम ५,१५ प्रमाणे गुन्हे दाखल करण्यात आलेले आहेत. कलम १८८ अंतर्गत एक महिन्याचा साधा कारावास व दोनशे रुपये दंड तर कलम ३३६ अंतर्गत तीन महिन्यांचा कारावास तसेच २५० रुपये दंडाची तरतूद आहे.
------------------------------------------------------------
चायना मांजाची विक्री रोखण्यासाठी नगर शहरात पोलीस पथके तैनात करण्यात आलेली आहे. तपासणी मोहिमेत अनेक ठिकाणी मांजा जप्त करून विक्रेत्यांवर गुन्हे दाखल केले आहेत. चायना मांजा विक्रीविरोधात तपासणी मोहिम येणाऱ्या काळातही सुरूच राहणार आहे. विक्रेत्यांनी चायना मांजाची विक्री करू नये तसेच पर्यावरणमुक्त संक्रात साजरी करण्यासाठी पतंग उडवू नयेत. कायद्याचे उल्लंघन करताना कुणी आढळून आले तर कडक कारवाई केली जाणार आहे.
- विशाल ढुमे, पोलीस उपाधीक्षक नगर शहर
फोटो १३ मांजा
ओळी- शहरातील बागडपट्टी येथून पतंग स्टॉलची तपासणी करताना महापालिकेचे पथक