चांंदेकसारे : कोपरगाव तालुक्यातील चांदेकसारे झगडे फाटा परिसरात नऊ चारी वाहते. जवळपास शंभर एकर भरणे असलेल्या शेतकऱ्यांनी एकत्र येऊन लोकवर्गणीतून नवचारीची पोटचारी जेसीबी मशीनने उकरण्याचा निर्णय घेतला आहे. शनिवारी याचे काम सुरू झाले आहे.
पाटबंधारे विभागाने या चाऱ्यांची दुरुस्ती करायला हवी. मात्र, त्यांनी याकडे पूर्ण कानाडोळा केला आहे. चढाचा फाटा म्हणून ओळख असलेल्या चारीचे काम शनिवारी लोकवर्गणीतून सुरू झाले. लाभक्षेत्रातील शेतकरी व्ही. टी. होन, कल्याण होन, भिमाजी होन, अरूण होन, भीमभाऊ होन, किरण होन, चंद्रकांत होन, राजेंद्र जगताप, पांडुरंग होन यांनी एकत्रित येत लोकवर्गणीतून चारीचे खोलीकरण व रुंदीकरण करण्याचा निर्णय घेतला व त्यासाठी लोकवर्गणी गोळा केली.
कोपरगाव तालुक्यातील चांदेकसारे झगडे फाटा परिसरात गोदावरी उजव्या कालव्याची नऊ चारी वाहते. गोदावरी कालव्याला जवळपास शंभर वर्षे पूर्ण झाली आहेत. त्यामुळे चाऱ्यांची अवस्था काय असेल, हे सांगायलाच नको. गोदावरी उजव्या कालव्याच्या लाभक्षेत्रातील मेन चाऱ्याची अवस्था वाईट आहे. मात्र, पोटचारी पूर्णत: नादुरुस्त झाली आहे. या चारीने शेतकऱ्यांना आपल्या शेतात पाणी नेण्यासाठी मोठी कसरत करावी लागते. पाटबंधारे विभागाने दिलेले पाणी या पोटचारीतून अनेक शेतात गळती होऊन नेले जाते. त्यामुळे परिसरातील शेतकऱ्यांनी आपल्या शेतात पाणी आणायचे म्हटले की, मोठा प्रश्न निर्माण होतो. या सर्व गोष्टी पाटबंधारे विभागाने करणे आवश्यक आहेत. मात्र, पाटबंधारे विभाग केवळ सात नंबर फाॅर्म भरून घेण्यातच मश्गुल असतो. आधी पाटपाणी बाकी मग सात नंबर अर्ज स्वीकारला जातो, असा आरोपही शेतकऱ्यांनी केला आहे.
...
कारखान्यांमार्फत होत चाऱ्यांची दुरुस्ती
पूर्वी कोपरगाव तालुक्याची कामधेनू म्हणून ओळख असलेले सहकारमहर्षी शंकरराव कोल्हे कारखाना व कर्मवीर शंकरराव काळे सहकारी साखर कारखान्यांमार्फत कारखान्याच्या लाभक्षेत्रातील शेतकऱ्यांनी मागणी केल्यानंतर ही कामे केली जायची. जास्तीत जास्त तालुक्‍यात ७ नंबर फार्म कसे भरले जातील, हे देखील कारखान्यावर ठरवले जायचे. त्यामुळेच या परिसरात ऊस क्षेत्र जास्त असायचे. मात्र, याकडेही आता दुर्लक्ष झाले आहे, असे शेतकरी व्ही. टी. होन, भिमाजी होन यांनी सांगितले.