अहमदनगर : जमिनीची फेरफार नोंद मंजूर करण्यासाठी रुईछत्तीसी (ता. नगर)मंडळाचे मंडल अधिकारी अविनाश मनोहर दाभाडे याला दीड हजार रुपयांची लाच स्वीकारताना नगर येथील लाचलुचपत प्रतिबंधक विभागाच्या पथकाने रंगेहाथ पकडले. दाभाडे याला अटक करण्यात आली आहे. नाशिक विभागाने दोन पोलिसांना लाच घेताना पकडल्यानंतर २४ तासांच्या आतच ही दुसरी घटना घडली आहे. तक्रारदारांच्या आईच्या नावे सन २००१ मध्ये मठ पिंपरी (ता.नगर) येथील एक एकर चार आर या खरेदी केलेल्या जमिनीची फेरफार नोंद मंजूर करण्यासाठी दाभाडे याने तक्रारदार यांच्याकडे दीड हजार रुपये मागितले. ही लाच दाभाडे याने मंगळवारी सायंकाळी साडेपाच वाजता नगरच्या तहसील कार्यालयात स्वीकारली. दरम्यान दाभाडे यांच्या रेल्वेस्टेशन रोडवरील आगरकर मळ््यामधील घराचीही झडती घेण्यात आली. मात्र त्यामध्ये काहीही सापडले नाही, अशी माहिती लाचलुचपत प्रतिबंधक विभागाचे पोलीस उपअधीक्षक अशोक देवरे यांनी दिली. लाचलुचपतचे कार्यालय असलेल्या आवारातच दाभाडे याने लाच स्वीकारल्याने अधिकार्यांवर धाक नसल्याची चर्चा सुरू आहे. (प्रतिनिधी) बंगल्याची झडती मंडलाधिकारी असलेला दाभाडे यांचे वडील प्राचार्य होते. त्यांचा रेल्वेस्टेशन रोडवरील आगरकर मळ्यात एक मोठा बंगला आहे. त्या बंगल्यामध्येच दाभाडे कुटुंबासह राहतो. या बंगल्यात आणखी दोन-तीन भाडेकरूही राहतात. शिवाय दाभाडे मंडलाधिकारी आहे. त्यामुळे त्याची आर्थिक परिस्थिती चांगली आहे. मात्र केवळ दीड हजार रुपयांसाठी दाभाडे लाचेच्या जाळ्यात अडकला.
लाच स्वीकारताना मंडल अधिकारी जेरबंद
By admin | Updated: May 14, 2014 00:19 IST