देवदैठण : श्रीगोंदा तालुक्यातील ढवळगाव ते बेलवंडी फाटा रस्त्याची दुरावस्था झाली असून मोठमोठे खड्डे पडलेले आहेत. याकडे प्रशासन दुर्लक्ष करत आहे. त्यांचे लक्ष वेधण्यासाठी श्रीगोंदा तालुका राष्ट्रीय वारकरी परिषदेतर्फे बुधवारी सकाळी धोकादायक खड्ड्यात वृक्षारोपण करण्यात आले.
यावेळी कार्याध्यक्ष सारंग महाराज दंडवते, तालुकाध्यक्ष दादा महाराज ढवळे, समन्वयक दादा महाराज तांबे, उपाध्यक्ष अरुण महाराज जाधव यांनी प्रातिनिधिक स्वरूपात वृक्षारोपण केले.
मंगळवारी सुरेगाव येथील संजय रामफळे, पत्नी आशा रामफळे व मुलगा वेदांत हे पुण्याला दुचाकीवर निघाले होते. कौठाळे मळ्याजवळ पडलेल्या भल्यामोठ्या खड्ड्याचा अंदाज न आल्याने त्यांचा अपघात झाला. यात तिघेही गंभीर जखमी झाले. त्यांना तंटामुक्ती समितीचे अध्यक्ष राजेंद्र कौठाळे, संतोष महाराज कौठाळे, विकास कौठाळे, श्रीकांत कौठाळे, सुरेश कौठाळे यांनी उपचारासाठी दवाखान्यात नेले.
या अगोदर दुचाकीवरील तरूण खड्ड्यात वाहन आदळून जबर जखमी झाले होते. सारंग दंडवते यांच्या वाहनाला एकजण खड्ड्याचा अंदाज न आल्याने पाठीमागून धडकला. खड्डा चुकविताना एक ट्रक दुसऱ्या वाहनाला पाठीमागून धडकल्याने ट्रकचे मोठे नुकसान झाले. अनेकांना मणक्याचे विकार जडले आहेत.
या मार्गावर सातत्याने ढवळगाव फाटा, देवदैठण येथील कौठाळे वस्ती, आंबराई, राजापूर फाटा, लांडग्याचा ओढा येथे ठराविक ठिकाणी मोठमोठे खड्डे पडत आहेत. या मार्गावरील पडलेले खड्डे लवकरात लवकर बुजवावे, अन्यथा आंदोलन उभारले जाईल, असा इशारा वारकरी परिषद, पं.स. सदस्या कल्याणी लोखंडे, सरपंच जयश्री गुंजाळ, उपसरपंच पूजा बनकर, तंटामुक्ती समिती अध्यक्ष राजेंद्र कौठाळे, कुकडीचे संचालक सुभाष वाघमारे, माजी उपसरपंच विश्वास गुंजाळ, उद्योजक अतुल लोखंडे, उद्योजक वसंत बनकर, हिंगणीचे माजी उपसरपंच संदीप तरटे, उद्योजक सर्जेराव कौठाळे यांनी दिला आहे.
---
ढवळगाव-बेलवंडी फाटा मार्गावरील खड्ड्यांची पाहणी केली आहे. रस्ता दुरुस्तीचे टेंडर नोव्हेंबरपर्यंत निघेल. मात्र तोपर्यंत मोठेमोठे खड्डे बुजविण्याची व्यवस्था लवकरच करू.
अरविंद अम्प्लेकर,
उपअभियंता, सां. बा. विभाग, श्रीगोंदा
-----
२१ देवदैठण
ढवळगाव-बेलवंडी फाटा दरम्यानच्या रस्त्यावर पडलेल्या खड्ड्यात वृक्षारोपण करताना वारकरी परिषदेचे सदस्य.
210721\img-20210721-wa0041.jpg
श्रीगोंदा तालुक्यातील देवदैठण येथील अपघातातील दुचाकी व वारकरी परीषदेतर्फे प्रशासनाचे लक्ष वेधण्यासाठी वृक्षारोपण केले .( छायाचित्र - संदीप घावटे )