संगमनेर : २०२४ मध्ये पंतप्रधान म्हणून नरेंद्र मोदींचा नंबर लागणार आहे. नरेंद्र मोदी आणि माझा नंबर कुणीही काटू शकत नाही. मागच्या वेळेला शिर्डी लोकसभा मतदारसंघातून मी उभा होतो, यावेळी संधी मिळाल्यास उभा राहील. निवडणुकीत उभा नाही राहिलो तरीही तुमच्या पाठीशी कायम उभा राहील. असे रिपब्लिकन पार्टी ऑफ इंडियाचे राष्ट्रीय अध्यक्ष, केंद्रीय सामाजिक न्यायमंत्री रामदास आठवले म्हणाले.
मंगळवारी (दि.०५) संगमनेर बसस्थानक परिसरात सामाजिक सलोखा परिषद व संविधान सन्मान सोहळा आयोजित करण्यात आला होता. यावेळी ते बोलत होते. रात्री उशिरा केंद्रीय मंत्री आठवले यांचे संगमनेरात आगमन झाले. फटाक्यांची आतषबाजी करण्यात आली. जेसीबीद्वारे फुलांची उधळण करण्यात आली. व्यासपीठावर माजी मंत्री अविनाश महातेकर, रिपब्लिकन पार्टी ऑफ इंडियाचे प्रदेश उपाध्यक्ष बाळासाहेब गायकवाड, संगमनेर तालुकाध्यक्ष आशिष शेळके, शहराध्यक्ष कैलास कासार आदी यावेळी उपस्थित होते.