लोकमत न्यूज नेटवर्क
कोपरगाव : राज्य शासनाकडून पर्यावरणासाठी हानिकारक असलेल्या व विघटन न होणाऱ्या प्लास्टिक पिशव्या वापरावर बंदी आणली आहे. बंदी असूनही कोपरगाव शहरात आजही मोठ्या प्रमाणात प्लास्टिक पिशव्यांचा वापर होत आहे. अशा पिशव्यांचा वापर करणाऱ्या अथवा विक्री करणाऱ्या व्यापाऱ्यांवर नगरपरिषदेमार्फत वारंवार कारवाई केली जाते. त्यामुळे व्यापारी वर्गातून नाराजी व्यक्त केली जात असून प्लास्टिक पिशव्यांना पर्याय उपलब्ध करून देण्याची मागणी होत आहे.
कोपरगाव शहरात मोठी बाजारपेठ असल्याने अगदीच छोट्यापासून तर मोठ्यापर्यंत मोठी दुकाने आहेत. या बाजारपेठेत विविध खरेदीसाठी तालुक्यासह इतर तालुक्यातील नागरिक मोठ्या संख्येने येतात. गेल्या अनेक वर्षांत ग्राहकांनाच मोठ्या प्रमाणात प्लास्टिक पिशव्यांची सवय लागल्याने सेवा म्हणून व्यावसायिकांना ती दुकानात ठेवावीच लागत आहे. त्यावर पर्याय म्हणून ५० मायक्रोनच्या वरील प्लास्टिक पिशव्या वापरण्यास परवानगी दिलेली आहे. तर त्यापेक्षा खालची प्लास्टिक पिशवी वापरली तर दंडात्मक कारवाईची तरतूद केली आहे.
यानुसार अनेकवेळा नगरपरिषदेकडून प्लास्टिक पिशव्या वापरणाऱ्या व्यापाऱ्यावर कारवाई करण्यात आली. परंतु, व्यापारी देखील आता ५० मायक्रोनच्या वरील पिशव्या वापरत आहेत. तरीही नगर परिषदेकडून कारवाई केली जाते. विशेष म्हणजे, ही कारवाई करताना पिशव्या किती मायक्रोनच्या आहेत हे तपासण्यासाठी कोणतेही यंत्र अथवा तंत्र नगर परिषदेकडे नाही. त्यामुळे चूक असल्यास प्रशासनाने अवश्य कारवाई करावी, अशी भावना व्यावसायिकांमधून व्यक्त होत आहे.
.............
असे आहेत शहरातील व्यावसायिक
॰ खासगी व्यावसायिक दुकानदार- १०५७
॰ नगर परिषद गाळे धारक - ६५३
॰ सर्वच प्रकारचे पथविक्रेते - १३६८
॰ आठवडे बाजारातील सर्वच विक्रेते- २१५०
..............
कोपरगावात बहुतांश व्यावसायिक हे ५० मायक्राॅनपेक्षा अधिकच्या प्लास्टिक पिशव्या वापरतात. मात्र, काही पिशव्यांवर फक्त तसा शिक्का मारलेला असतो. तशा पिशव्यांच्या मायक्रोनची आमच्याकडे असलेल्या यंत्राने तपासणी केल्यानंतर कारवाई केली जाते.
- सुनील गोर्डे, उपमुख्याधिकारी, कोपरगाव
..........
सिंगल यूज प्लास्टिक पिशवी वापरण्यास समर्थन नाही. परंतु, व्यापारी वर्गाने ५० मायक्राॅनच्या प्लास्टिक पिशव्या वापरण्यास सुरुवात केली आहे. या पिशव्यांचे विघटन होते, असे देखील लिहिलेले असते. नगर परिषदेकडून अशी कारवाई होते, त्यावेळी पिशव्यांची तपासणी करून कारवाई करा म्हटले, तर त्यांच्याकडे तपसणीसाठी कोणतेही यंत्र, तंत्र नसते. त्यामुळे व्यावसायिकांना नियमात असताना देखील कारवाईला सामोरे जावे लागते.
- सुधीर डागा, कार्याध्यक्ष, व्यापारी महासंघ, कोपरगाव