दरीत कोसळून नाशिकच्या युवकाचा मृत्यू

विश्रामगड पट्टाकिल्ला परिसरातील कोकणवाडी शिवारातील पवनचक्की क्रमांक ५४ च्या जवळ कड्यावरुन खोल दरीत कोसळून नाशिक रोड येथील एका पर्यटक तरुणाचा मृत्यू झाला.अभिषेक विनोदकुमार उपाध्याय (वय २६) असे त्याचे नाव आहे.

लोकमत न्यूज नेटवर्क अकोले : तालुक्यातील विश्रामगड पट्टाकिल्ला परिसरातील कोकणवाडी शिवारातील पवनचक्की क्रमांक ५४ च्या जवळ कड्यावरुन खोल दरीत कोसळून नाशिक रोड येथील एका पर्यटक तरुणाचा मृत्यू झाला.अभिषेक विनोदकुमार उपाध्याय (वय २६) असे त्याचे नाव आहे. रविवारी रात्री साडेआठ वाजण्याच्या सुमारास ही घटना घडली असून पोलिसांनी आकस्मात मृत्यूची नोंद केली आहे. पोलिसांना व ग्रामस्थांना रविवारी रात्री घटनेची माहिती कळताच त्यांनी स्थानिक गिर्यारोहक व सर्पमित्रांच्या मदतीने शोध कार्य सुरु केले. मात्र धुक्यामुळे रात्री शोधले कामात अडथळा आला. सोमवारी सकाळी दरीतून संबंधीत तरुणाचा मृत्यदेह बाहरे काढण्यात आला. दुपारी अकोले ग्रामीण रुग्णालयात आणला गेला. सायंकाळी शवविच्छेदनानंतर मृृतदेह नातेवाईकांच्या ताब्यात देण्यात आला. रविवारी अभिषेक विनोदकुमार उपाध्याय नाशिक महाविद्यालयात शिक्षण घेत असलेला युवक आपल्या तीन मित्रांसोबत घरी पिच्चरला जातो असे सांगून विश्रामगड परिसरात पर्यटनासाठी आला होता. रात्री साडे सात वाजण्याच्या दरम्यान कोकणवाडी शिवारातील पवनचक्की क्रमांक ५४ च्या बाजूला कोकणकड्यावर हे चार मित्र पोहोचले. तेथे काही वेळ थांबले. दरम्यान अभिषेक टाकेदच्या बाजूच्या दरीत कोसळला. सेल्फीच्या नादात त्याचा दरीत तोल गेला असावा असा प्राथमिक आंदाज व्यक्त होत असून त्याच्या सोबतच्या तरुणांना तो दरीत पडल्याची बाब लक्षात येताच त्यांनी स्थानिक गावकºयांच्या मदतीने शोध सुरु केला. पण खोल दरी, दाट जंगल,रात्रीचा अंधार, निशाचरांची भीती यामुळे शोध कार्यात अडथळा आला. सोमवारी सकाळी त्याचा मृतदेह स्थानिकांच्या मदतीने दरीतून बाहेर काढण्यात आला. त्याच्याबरोबर आलेले दोन मुले महाविद्यालयात अभियांत्रीकीचे शिक्षण घेतात तर एक खासजी नोकरीत आहे. या तिघांनाकडे पोलीस अधिक चौकशी करीत आहेत. विनोदकुमार पद्मदेव उपाध्याय, नाशिक रोड यांच्या खबरीवरुन अकोले पोलिसांत आकस्मात मृत्यूची नोंद झाली आहे. अभिषेक हा एकुलता एक होता. त्याला तीन बहिणी असून कॅनडा येथे त्या असल्याचे समजते.