नगरपालिकेने सर्वसाधारण सभा घ्यावी
श्रीरामपूर : शहरामध्ये शिवाजी चौकामध्ये छत्रपती शिवाजी महाराजांचा अश्वारुढ पुतळा बसविण्यासाठी श्रीरामपूर नगरपालिकेने विशेष सर्वसाधारण सभा घ्यावी, या मागणीचे २४ नगरसेवकांच्या सहीचे पत्र मुख्याधिकारी गणेश शिंदे यांना छत्रपती शिवाजी महाराज पुतळा संघर्ष समितीने दिले आहे. समितीचे प्रकाश चित्ते, अरुण पाटील, मनसेचे बाबा शिंदे, डॉ. दिलीप शिरसाठ, नगरसेवक किरण लुणिया, प्रवीण पैठणकर, अभिजीत कुलकर्णी उपस्थित होते.
-------
गळ्यातील गंठणची चोरी
श्रीरामपूर : थत्ते मैदानजवळ एका अपार्टमेंटजवळ महिलेस पत्ता विचारण्याचा बहाणा करीत महिलेच्या गळ्यातील ६० हजार रुपये किमतीचे गंठण बळजबरीने ओढून साथीदाराच्या मोटारसायकलवर बसून फरार झाल्याची घटना घडली. गुरुवारी (दि.२४) रोजी उत्सव मंगल कार्यालयाजवळील साई उत्सव अपार्टमेेंटजवळ सायंकाळी ७ च्या सुमारास पार्किंगसमोर एक महिला उभी असताना दुचाकीवर दोघे जण आले. त्यापैकी एका व्यक्तीने पत्ता विचारण्याच्या बहाण्याने तिच्या गळ्यातील गंठण बळजबरीने ओढून धक्का देत गेट बाहेर उभी असलेल्या दुचाकीवरून पळून गेला. गंठण चोरीप्रकरणी आश्विनी वैभव गोडसे या महिलेने शहर पोलीस ठाण्यात दिलेल्या फिर्यादीवरून अज्ञात चोरट्याविरुद्ध गुन्हा नोंदविण्यात आला.