महिलेसह दोघांवर बिबट्याचा हल्ला

संगमनेर : सकाळी पिंपळगाव देपाकडे देवदर्शनासाठी पायी निघालेल्या महिलेसह दोघा शेतकऱ्यांवर बिबट्याने हल्ला करून जखमी केले. मात्र, पळत सुटलेला हल्लेखोर बिबट्या विहिरीत पडला. दोन तासांच्या अथक प्रयत्नानंतर वन विभागाच्या कर्मचाऱ्यांनी त्याला अलगदपणे पिंजऱ्यात जेरबंद केले. या चित्तथरारक घटनेमुळे गांजवे वस्तीवरील ग्रामस्थ हादरून गेले आहेत. पठार भागातील पिंपळगाव देपानजीकच्या गांजवे वस्तीवर राहणाऱ्या मनीषा रेवजी गांजवे (वय ३८) या रविवारी सकाळी आठ वाजण्याच्या सुमारास देवदर्शनासाठी पायी पिंपळगाव देपा गावात जात होत्या. दरम्यान, शेतामध्ये दबा धरून बसलेल्या बिबट्याने पाठीमागून अचानकपणे त्यांच्यावर हल्ला केला. बिबट्याने पंजे पाठीत मारल्याने मनीषा गांजवे जखमी झाल्या. हे दृश्य प्रत्यक्ष पाहणाऱ्या पोपट सुखदेव गांजवे (वय ४०) व सोपान किसन गांजवे (वय ३३) यांनी हल्लेखोर बिबट्यास हुसकावून लावण्याचा प्रयत्न केला. मात्र, चवताळलेल्या बिबट्याने पोपट गांजवे यांच्यावर चाल करून त्यांच्या पोटाला डाव्या बाजूने कडाडून चावा घेतला. बिबट्याचे दात पोटात घुसल्याने गांजवे गंभीर जखमी झाले, तर सोपान गांजवे हे बिबट्याच्या तावडीतून बालंबाल बचावले. गांजवे यांनी आरडाओरड केल्याने बिबट्याने धूम ठोकली. मात्र, पळता-पळता तो शेतातील विहिरीत पडला. माहिती समजताच वनपरिक्षेत्र अधिकारी प्रकाश सुतार यांनी वन कर्मचाऱ्यांसह घटनास्थळी धाव घेतली. सुमारे दोन तासांच्या अथक प्रयत्नानंतर विहिरीत पडलेल्या बिबट्यास क्रेनच्या सहाय्याने बाहेर काढून पिंजऱ्यात जेरबंद करण्यात यश आले. सदर बिबट्या हा अंदाजे तीन वर्षांचा असून तो मादी जातीचा आहे. बिबट्याला बघण्यासाठी ग्रामस्थांनी विहिरीभोवती मोठी गर्दी केली होती. या चित्तथरारक घटनेमुळे गांजवे वस्तीवरील ग्रामस्थ हादरून गेले आहेत. (प्रतिनिधी) बिबट्याच्या हल्ल्यात जखमी झालेल्या मनीषा गांजवे व पोपट गांजवे यांना घुलेवाडी ग्रामीण रुग्णालयात नेण्यात आले असून त्यांच्यावर उपचार सुरू आहेत. बिबट्याला वाचविण्यासाठी वन कर्मचारी आर. एस. चत्तर, वनरक्षक जी. एम. मुळे, बाळू फटांगरे, मुरलीधर वर्पे, अरगडे, सुभाष खरात, भाऊसाहेब कदम, दिलीप कुडेक, शरद मिंडे, वन मजूर किसन साबळे, रवी पडवळे यांच्यासह उत्तम वाळुंज, भाऊसाहेब खेमनर, डॉ. पांडुरंग गुंड, उपसरपंच नवनाथ कचरे यांनी विशेष परिश्रम घेतले. पकडलेल्या बिबट्यास वन विभागाच्या संगमनेर खुर्द येथील रोपवाटीकेत ठेवण्यात आले आहे.