सौरऊर्जा प्रकल्पाच्या भूमिपूजनासाठी अजित पवार यांनी राहुरी रुग्णालयाचा प्रश्न तडीस लावण्याचे आश्वासन उपस्थितांना दिले.
राहुरीचे ग्रामीण रुग्णालय अनेक वर्षांपासून निधी पडून असूनही इमारतीचा प्रश्न मार्गी लागलेला नाही. त्यामुळे राहुरी तालुक्यातील रुग्णांना श्रीरामपूर, प्रवरानगर, नगर, पुणे, विळद अशा ठिकाणी उपचार घेण्यासाठी जावे लागते. अशावेळी सर्वसामान्य रुग्णांची हेळसांड होते. अजित पवार यांच्या वक्तव्यामुळे ग्रामीण रुग्णालयाचा प्रश्न मार्गी लागण्यास मदत होईल, अशी अपेक्षा व्यक्त करण्यात येत आहे. राहुरी बसस्थानकाची इमारत पडण्याच्या मार्गावर आहे.
पावसाळ्यात स्लॅबमधून पाणी पडत असते. नगर ते मनमाड रोडवर अतिशय महत्त्वाचे आणि शिर्डी, शिंगणापूर प्रवास करणाऱ्या भाविकांना राहुरीचे बसस्थानक अतिशय महत्त्वाचे आहे. मात्र, हे बसस्थानक कधीही पडू शकते. त्यामुळे अजित पवार यांनी बसस्थानकालाही हिरवा कंदील दाखविला आहे. पवार यांनी बसस्थानकासाठी निधी कमी पडू दिला जाणार नाही, असे आश्वासन उपस्थितांना दिले. राहुरीचे प्रलंबित प्रश्न निधी उपलब्ध झाल्यावर कधी मार्गी लागतात, याकडे संपूर्ण राहुरी तालुक्याचे लक्ष वेधले आहे.