अकोले : शेततळ्यात पडलेल्या मुलीला वाचविण्यासाठी गेलेल्या पित्याचा मुलीसह मृत्यू झाल्याची घटना अकोले तालुक्यातील वीरगाव येथे सोमवारी दुपारी दोन वाजण्याच्या सुमारास घडली.
वीरगाव येथे दुपारी दोन वाजता अश्विनी कृष्णांगर थोरात (वय १६) ही दहावीची विद्यार्थिनी अभ्यासासाठी शेततळ्याच्या काठावर बसली होती. पाय घसरून ती शेततळ्यात पडली. तिचा आवाज ऐकून तिचे वडील कृष्णांगर जगन्नाथ थोरात (वय ४५) यांनी शेततळ्याकडे धाव घेतली. कृष्णांगर यांना फारसे पोहता येत नसतानाही त्यांनी मुलीला वाचविण्यासाठी शेततळ्यात उडी घेतली. ते मुलीला वाचवू शकले नाहीत आणि दोघांचाही पाण्यात बुडून मृत्यू झाला.
काही वेळाने घरातील लोकांनी गावकरी व वाटसरू यांच्या मदतीने दोघांचे मृतदेह बाहेर काढले. शवविच्छेदनासाठी अकोले ग्रामीण रुग्णालयात आणले. वीरगाव येथे शोकाकुल वातावरणात अंत्यसंस्कार करण्यात आले.