संगमनेर : तीन महिन्यांपूर्वी चेहऱ्यावर लावण्यासाठी ट्यूब मागितली होती, त्यावेळी ट्यूब न दिल्याच्या कारणावरून दोघांनी मिळून एकाला शिवीगाळ व दमदाटी केली. डाव्या हाताच्या कोपऱ्यावर कोयत्याने मारून दुखापत करण्यात आली. ही घटना शनिवारी (दि.१४) रात्री ११.४५ च्या सुमारास संगमनेर शहरातील बटवाल मळा परिसरात घडली. या प्रकरणी दोघांविरुद्ध संगमनेर शहर पोलिस ठाण्यात गुन्हा दाखल झाला आहे.
उमेर मनसूर व्यापारी, इरफान मनसूर व्यापारी (दोघेही रा. बटवाल मळा, संगमनेर) अशी गुन्हा दाखल झालेल्या दोघांची नावे आहेत. त्यांच्याविरुद्ध अरबाज शेख (रा. बटवाल मळा, संगमनेर) या २६ वर्षीय युवकाने दिलेल्या फिर्यादीवरून गुन्हा दाखल करण्यात आला. त्याला मारहाण करण्यात आली. शेख आणि व्यापारी हे एकमेकांचे जवळ राहतात.
तीन महिन्यांपूर्वी उमेर व्यापारी याने शेख याच्याकडे चेहऱ्यावर लावण्यासाठी ट्यूब मागितली होती, त्यावेळी ट्यूब न दिल्याचा राग होता. त्यावरून शेख याला शिवीगाळ, दमदाटी करत उमेर व्यापारी याने त्याच्या डाव्या हाताच्या कोपऱ्यावर कोयत्याने मारून दुखापत केली, असे फिर्यादित म्हटले आहे. पोलिस हेड कॉस्टेबल धनवट अधिक तपास करीत आहेत.