तिसगाव : पाथर्डी तालुक्याची कामधेनु असलेल्या श्री वृद्धेश्वर सहकारी साखर कारखान्याच्या अध्यक्षपदी ज्येष्ठ नेते, माजी आमदार आप्पासाहेब राजळे तर रामकिसन काकडे यांची उपाध्यक्षपदी फेरनिवड निवड करण्यात आली.
प्रांताधिकारी तथा निवडणूक निर्णय अधिकारी देवदत्त केकाण यांच्या अध्यक्षतेखाली नूतन संचालक मंडळाची बैठक शुक्रवारी सकाळी ११ वाजता आदिनाथनगर येथे डॉ. आण्णासाहेब शिंदे सभागृहात झाली. अध्यक्षपदासाठी राजळे यांच्या नावाची सूचना ज्येष्ठ संचालक उद्धवराव वाघ यांनी मांडली. बाबासाहेब किलबिले यांनी अनुमोदन दिले. उपाध्यक्षपदासाठी काकडे यांच्या नावाची सूचना सुभाषराव बुधवंत यांनी मांडली. सुभाषराव ताठे यांनी अनुमोदन दिले. राज्य साखर कामगार संघ, कारखान्याचा प्रशासन विभागाच्या वतीने राजळे, काकडे यांचा सत्कार करण्यात आला.
याप्रसंगी कारखान्याच्या नूतन संचालिका आमदार मोनिका राजळे, सिंधुताई जायभाय, संचालक राहुल राजळे, काकासाहेब शिंदे, बाळासाहेब गोल्हार, शरद अकोलकर, कुशीनाथ बर्डे, अनिल फलके, श्रीकांत मिसाळ, सहाय्यक निवडणूक अधिकारी रमेश ससाणे, कार्यकारी संचालक जालिंदर पवार प्रसंगी उपस्थित होते.