न्यू आर्टस्मध्ये हाणामारी

अहमदनगर : शिक्षकांना उलट बोलू नकोस, असे सांगितल्याचा राग आल्याने एका गटाने दोन प्राध्यापकांसह विद्यार्थ्यांना मारहाण केली. न्यू आर्टस् महाविद्यालयातील कॅन्टीनसमोर शनिवारी सकाळी साडेदहा वाजता ही घटना घडली.दोन राजकीय नेत्यांच्या नावाचे गट कॉलेज आवारात सक्रीय आहेत. त्यांच्यामध्ये दोन दिवसांपूर्वी कॉलेज परिसरात हाणामारी झाली होती. तोच वाद शनिवारी सकाळी पुन्हा उफाळला. एका राजकीय नेत्याचे एकेरी नाव घेतल्याने दुसऱ्या गटाने विठ्ठल महादेव कोतकर (रा. केडगाव देवी) याला जबर मारहाण केली. त्यामध्ये तो जखमी झाला. यामध्ये मध्यस्थी करणाऱ्या महाविद्यालय शिस्तपालन समितीच्या दोन प्राध्यापकांनाही मारहाण करण्यात आली. बराचवेळ हा गदारोळ सुरू होता. तोफखाना पोलीस ठाण्याचे पोलीस निरीक्षक अविनाश मोरे त्यांच्या पथकासह दाखल होण्यापूर्वीच हाणामारी करणारे सर्वच पळून गेले. पोलीस उपअधिक्षक बजरंग बनसोडे यांनी घटनास्थळी भेट देवून कॉलेज व्यवस्थापनाला सूचना केल्या. या मारहाणीत जखमी झालेला विठ्ठल महादेव कोतकर याने तोफखाना पोलीस ठाण्यात तक्रार दाखल केली आहे. अभि भिंगारदिवे आणि इतर तीन जणांनी मारहाण केल्याचे तक्रारीत म्हटले आहे. याप्रकरणी पोलिसांनी अदखलपात्र गुन्ह्याची नोंद केली आहे. दरम्यान हाणामारी करणाऱ्यांपैकी काही विद्यार्थ्यांनी याआधीच कॉलेज व्यवस्थापनाकडे गैरवर्तन केल्याबद्दल माफीनामा दिलेला आहे. असे असतानाही शनिवारी पुन्हा त्याच विद्यार्थ्यांनी हाणामारी केली आहे.कॉलेजच्या आवारात ओळखपत्र असल्याशिवाय कोणालाही प्रवेश देऊ नये. कॉलेजला एकच प्रवेशद्वार असावे. कॉलेजमध्ये येऊन पोलिसांना हस्तक्षेप करावा लागणे, हे दुर्दैव आहे. गुंड प्रवृत्तीच्या विद्यार्थ्यांवर प्राचार्यांनी कारवाई करावी. प्राचार्यांनी कारवाई न केल्यास पोलिसांना हस्तक्षेप करावा लागेल.-बजरंग बनसोडे,पोलीस उपअधीक्षक