अहमदनगर : महापालिका स्थायी समितीचे निम्मे आठ सदस्य सोमवारी निवृत्त होत असून, नवीन सदस्य निवडीसाठी सत्ताधाऱ्यांवर दबाव वाढला आहे. महापौरांनी महासभा घेऊन नवीन सदस्यांची निवड केल्यास सभापतीपदाच्या निवडणुकीचा मार्ग मोकळा होईल. सभापतीपदासाठी माजी सभागृह नेते स्वप्निल शिंदे व राष्ट्रवादीकडून कुमार वाकळे यांच्या नावाची चर्चा असल्याने सभापतीपदासाठी चांगलीच चुरस पाहायला मिळणार आहे.
महापालिकेत स्थायी ही महत्त्वाची समिती आहे. स्थायी समितीवर सदस्य म्हणून जाण्यासाठी नगरसेवकांत रस्सीखेच असते. या समितीतील आठ सदस्य दरवर्षी निवृत्त होतात. उर्वरित आठ सदस्यदेखील दोन वर्षांनी निवृत्त होतात. स्थायीतील निम्मे आठ सदस्य सोमवारी निवृत्त होत असून, नवीन आठ सदस्य निवडीकरिता महासभा बोलाविण्याबाबत नगरसचिव विभागाने महापौर कार्यालयास प्रस्ताव दिला आहे. परंतु, नवीन आठ सदस्यांची निवड झाल्यास स्थायी समितीची १६ सदस्य संख्या पूर्ण होऊन सभापतीपदाची निवडणूक लागेल. नगरसेवक मनोज कोतकर हे सप्टेंबरमध्ये सभापती झाले. सभापतीपदाची निवडणूक जाहीर झाल्यास कोतकर यांना चार महिन्यांतच सभापतीपद गमवावे लागेल. सभापतीपद कायम ठेवण्यासाठी कोतकर यांचे पडद्याआडून प्रयत्न सुरू आहेत. परंतु, राजकीय पक्षांकडून नगरसेवकांना सदस्यपदाचे शब्द दिले गेलेले आहेत. इच्छुकांचा सभा घेण्यासाठी दबाव वाढू लागला आहे. त्यात नवीन सदस्य निवडल्यास सभापती निवडणूक जाहीर होणार असल्याने सत्ताधाऱ्यांसमोर राजकीय पेच निर्माण झाला आहे. सभापतीपदासाठी माजी सभागृह नेते शिंदे व नगरसेवक वाकळे यांचे नाव पुढे येत आहे. महापौर वाकळे हे इच्छुकांची नाराजी ओढावून घेतील, असे वाटत नाही. कारण वाकळे यांच्या दोन वर्षांच्या कार्यकाळात कुठलाही राजकीय वाद निर्माण झालेला नाही. त्यामुळे महापौर कार्यालयाकडून महासभेची तारीख लवकरच जाहीर केली जाईल, असेही बोलले जाते.
....
संग्राम जगतापांच्या भूमिकेकडे लक्ष
महापालिकेत राष्ट्रवादीच्या पाठिंब्यावर भाजपची सत्ता आहे. मागील सभापतीपदाच्या निवडणुकीत भाजपचे मनोज कोतकर हे राष्ट्रवादीत दाखल झाले. राष्ट्रवादीकडून ते बिनविरोध सभापती झाले. कोतकर यांना सभापती करण्यासाठी आमदार संग्राम जगताप यांनी पुढाकार घेतलेला होता. कोतकर हे सभापती होऊन पाच महिनेच झाले आहेत. कोतकर यांना मुदतवाढ की दुसऱ्याला संधी द्यायची, याबाबतचा निर्णयही जगताप यांच्याशी चर्चा करून घेतला जाईल, असे बोलले जाते. त्यामुळे जगताप काय भूमिका घेतात, याकडे सर्वांचे लक्ष लागले आहे.