चक्क कारमध्ये रचला दरोड्याचा कट, चार आरोपींना अटक

मंगळवारी रात्री अकरा वाजताच्या सुमारास नवीन कामठी पोलीस ठाण्याच्या हद्दीत पोलिसांचे पथक गस्तीवर होते.

लोकमत न्यूज नेटवर्क
नागपूर : कारमध्ये दरोड्याचा कट रचून शस्त्र घेऊन गुन्हा करण्यासाठी निघणाऱ्या चार आरोपींना पोलिसांनी अटक केली आहे. गुन्हे शाखेच्या वाहन चोरी व घरफोडी विरोधी पथकाने ही कारवाई केली.

मंगळवारी रात्री अकरा वाजताच्या सुमारास नवीन कामठी पोलीस ठाण्याच्या हद्दीत पोलिसांचे पथक गस्तीवर होते. खबऱ्यांच्या नेटवर्कच्या माध्यमातून मिळालेल्या माहितीवरून पोलिसांनी घोरपड गावाकडून शिरपुरकडे जाणाऱ्या मार्गाजवळील कालव्याजवळ सापळा रचून धाड टाकली. तेथे आशीष उर्फ मोनू किशोर मनपिया (२९, कांद्री, कन्हान), रजत दिलीप ननेट (२७, गौतमनगर, मेकोसाबाग), कार्तिक राम ननेट (२७, गौतमनगर, मेकोसाबाग), अब्दुल ताज उर्फ अब्दुल अजीज (३६, चित्तरंजन नगर, कामठी) यांना ताब्यात घेतले. त्यांचा रमाकांत नावाचा साथीदार फरार झाला.

आरोपींच्या ताब्यातून तीन चाकू, तलवार, मिरची पावडर, दोरी, चार मोबाईल आढळले. पोलिसांनी सर्व मुद्देमाल जप्त केला. त्यांच्याविरोधात गुन्हा दाखल करत त्यांना नवीन कामठी पोलीस ठाण्याच्या हवाली करण्यात आले. सहायक पोलीस निरीक्षक मयुर चौरसिया, अनिल इंगोले, दीपक रेठे, रवी अहीर, श्रीकांत उईके, प्रशांत गभने, प्रवीण रोडे, विलास कोकाटे, पंकज हेडाऊ, राहुल कुसराम, सुधीर पवार, अभय ढोणे यांच्या पथकाने ही कारवाई केली.