Lokmat Sarpanch Awards 2018 : कोल्हापूरातील अनिल पाटील यांना शिक्षण विभागातील ‘लोकमत सरपंच ऑफ द इयर’ पुरस्कार 

मुंबईतील यशवंतराव चव्हाण सेंटरमध्ये बुधवारी (दि.28) ‘लोकमत’चा राज्यस्तरीय सरपंच अवॉर्ड वितरण सोहळा थाटात पार पडला. या अवॉर्ड सोहळ्यात अनेक मान्यवर मंडळींनी हजेरी लावली होती. यावेळी ‘लोकमत’चा सरपंच ऑफ द इयर (शिक्षण विभाग) हा पुरस्कार कोल्हापूर जिल्ह्यातील मुदाळ गावचे सरपंच अनिल संभाजी पाटील यांना देण्यात आला.  

मुंबई : मुंबईतील यशवंतराव चव्हाण सेंटरमध्ये बुधवारी (दि.28) ‘लोकमत’चा राज्यस्तरीय सरपंच अवॉर्ड वितरण सोहळा थाटात पार पडला. या अवॉर्ड सोहळ्यात अनेक मान्यवर मंडळींनी हजेरी लावली होती. यावेळी ‘लोकमत’चा सरपंच ऑफ द इयर (शिक्षण विभाग) हा पुरस्कार कोल्हापूर जिल्ह्यातील मुदाळ गावचे सरपंच अनिल संभाजी पाटील यांना देण्यात आला.  

गट - शिक्षण
सरपंचाचे नाव - अनिल संभाजी पाटील
गाव - मुदाळ
तालुका - भुदरगड
जिल्हा - कोल्हापूर

अनिल संभाजी यांची कामगिरी...

कोल्हापूर जिल्ह्यातील भुदरगड तालुक्याचे प्रवेशव्दार म्हणून ओळखले जाणारे व ३४८७ लोकवस्तीचे मुदाळ हे छोटेसे गाव. तिथे शेतीसाठी व पिण्याच्या पाण्याचे मोठे दुर्भिक्ष्य आहे. मुदाळ गावचे रहिवासी मीठ व ट्रक व्यवसायात आहेत. मात्र त्यांना म्हणावे तसे यश मिळाले नाही. इथली तरुण मुले कोवळ््या वयातच शाळा सोडून व्यवसायाकडे वळली होती. अशा वेळेस अनिल संभाजी पाटील हे
गावचे सरपंच झाले. त्यांनी मुदाळ गावामध्ये शिक्षणक्रांती केली. के.जी. पासून पी.जी पर्यंत शिक्षणाची व्यवस्था या गावामध्ये केली. गावातील अंगणवाड्या ओस पडत होत्या. अनिल पाटील यांनी या अंगणवाड्या पुन्हा कशा फुलतील याचा प्रयत्न केला. आज गावामध्ये चार शासकीय अंगणवाड्यांमध्ये २०० हून अधिक बालके शिकत आहेत. कोल्हापूर जिल्हा परिषदेची गावात असलेली शाळा मोडकळीस
आलेली होती. विद्यार्थी संख्या कमी झाली होती. अनिल पाटील यांनी सरपंच या नात्याने शाळेत व शिक्षकांमध्ये उत्साहाचे वातावरण निर्माण केले. शैक्षणिक वर्ष २०१६/१७ मध्ये महाराष्ट्र राज्याच्या परीक्षा परिषदेने घेतलेल्या पुर्व प्राथमिक स्कॉलरशिप स्पर्धेत शाळेचे तब्बल १६ विद्यार्थी राज्याच्या गुणवत्ता यादीत एकाच वेळी चमकले. गावात श्री सद्गुरु बाळुमामा शिक्षण प्रसारक मंडळाच्या माध्यमातून इयत्ता
५ वी ते १२ वी कला विज्ञान या शिक्षणाची व्यवस्था करण्यात आली आहे. अनिल पाटील यांनी या शिक्षणसंस्थेच्या सहकार्यातून प. बा. पाटील माध्यमिक विद्यालय येथे इंग्रजी माध्यमास पर्याय म्हणून इयत्ता ५ वी ते १० पर्यंत इंग्रजी माध्यमाची सोय करुन हा उपक्रम दर्जेदारपणे चालविला. सेमी इंग्रजीचे शिक्षण सर्व स्तरावर निशुल्क ठेवले. त्याचा लाभ सामान्यातल्या सामान्य विद्यार्थ्यांना झाला. या प्रशालेत आज ४०हून अधिक प्रज्ञावान शिक्षक असन्ून १७००हून अधिक विद्यार्थी ज्ञानार्जनासाठी इथे येतात. मुदाळ येथे
आ. के. पी. पाटील फौंडेशनच्या माध्यमातून मुदाळ कृषी प्रदर्शनाचे दरवर्षी आयोजन करण्यात येते. या प्रदर्शनात ५०० स्टॉल असतात. कृषिपुरक गृहपयोगी गोष्टी, पाळीव जनावरे आदी विषयांची नीट मांडणी केलेली असते या प्रदर्शनास परिसरातील २ लाख लोक भेट देतात.
 

राज्यस्तरीय प्रथम पुरस्कार प्राप्त ग्रामपंचायतीस २५ लाख
पंचायतराज व्यवस्था अधिक बळकट करण्यासाठी ‘लोकमत’ने हाती घेतलेला हा उपक्रम स्तुत्य असून, ‘लोकमत’चा सरपंच आॅफ द ईअर पुरस्कार पटकाविणाऱ्या ग्रामपंचायतीला २५ लाख रुपये तर विविध गटातील पुरस्कार प्राप्त ग्रामपंचातयींना प्रत्येकी दहा लाखांचा विकास निधी देण्यात येईल, अशी महत्त्वपूर्ण घोषणा ग्रामविकास मंत्री पंकजा मुंडे यांनी केली. 
दरम्यान, कार्यक्रमाच्या अध्यक्षस्थानी भारतीय जनता पक्षाचे प्रदेशाध्यक्ष खासदार रावसाहेब दानवे होते. प्रमुख पाहुणे म्हणून कृषिमंत्री पांडुरंग फुंडकर, पर्यटन व रोजगार हमी मंत्री जयकुमार रावल, पशुसंवर्धन राज्यमंत्री अर्जुन खोतकर, राज्यमंत्री महादेव जानकर, राष्ट्रवादी काँग्रेसचे प्रदेशाध्यक्ष आमदार सुनील तटकरे, विधान परिषदेतील विरोधीपक्ष नेते धनंजय मुंडे, ‘लोकमत’च्या एडिटोरियल बोर्डाचे चेअरमन माजी खासदार विजय दर्डा, ज्युरी मंडळाचे अध्यक्ष तथा ‘लोकमत’चे एडिटर-इन-चीफ राजेंद्र दर्डा, आदर्श सरपंच पोपटराव पवार, बीकेटी टायर्सचे अध्यक्ष व व्यवस्थापकीय संचालक अरविंद पोद्दार, संयुक्त व्यवस्थापकीय संचालक राजीव पोद्दार उपस्थित होते.