Fake Currency LIVE DEMO : १० मिनिटात १०० रूपयांची बनावट नोट! लाइव्ह प्रात्यक्षिक!

सर्व दुकानदार दोन हजार, एक हजार व पाचशेच्या नोटा तपासून घेत असल्याने एका रिक्षाचालकाने शक्कल लढवत १०० रूपयांच्या नोटा बनवण्याचा छोटा कारखानाच सुरु केल्याची घटना उल्हासनगर मध्ये समोर आली आहे.

उल्हासनगर : सावधान...तुमच्या हातातील शंभराची नोट खरंच खरी आहे...ती बनावट तर नाही ना...काळजी घ्या...कुणीही नोट दिली तर आधी तपासा...कारण ऑनलाइन लोकमत तुमच्यासाठी अलर्ट जारी करतंय...शंभर रुपयाची नोट...फक्त दहा मिनिटात...तेही फारसं काहीच कष्ट न करता...विश्वासच बसणार नाही...पण ऑनलाइन लोकमत तुम्हाला दाखवतेय बनावट नोट बनवण्याचं थेट प्रात्यक्षिकच...

सर्व दुकानदार दोन हजार, एक हजार व पाचशेच्या नोटा तपासून घेत असल्याने एका रिक्षाचालकाने शक्कल लढवत १०० रूपयांच्या नोटा बनवण्याचा छोटा कारखानाच सुरु केल्याची घटना उल्हासनगर मध्ये समोर आली आहे. घरीच थाटलेल्या या कारखान्यात हा रिक्षाचालक १० मिनिटात शंभरची नोट बनवायचा. तो एका महिलेच्या मदतीने शहरातील मार्केटमध्ये या बनावट नोटा चलनात आणायचा. याप्रकरणी त्याला अटक केल्यानंतर या आरोपीने पोलिसांसमोर १० मिनिटात बनावट शंभराची नोट बनवण्याचा डेमो दाखवत आपला गुन्हा कबूल केला आहे.

राकेश इशराणी (३२) असे अटक केलेल्या आरोपीचे नाव असून राकेश हा सध्या पोलिस कोठडीत आहे. तो गेल्या २ ते ३ महिन्यांपासून राहत्या घरीच शंभराच्या बनावट नोटा तयार करत असल्याचे पोलीस चौकशीत आढळले. त्याकरता त्याने लोनवर १ प्रिंटर देखील आणले होते. आरोपी राकेश पूर्वी रिक्षा चालवत असताना त्यांची ओळख महिला आरोपी मिता मलानी सोबत झाली. बनावट नोटा चलनात आणायचे मार्गदर्शन या महिलेला करत तो तिला ५० टक्के कमिशन देत होता. मिता ही गर्दीच्या ठिकाणी मार्केटमध्ये जाऊन त्या नोटा चालवण्याचे काम करायची. त्या दोघांनी मार्केटमध्ये जवळपास ५० हजारांहून अधिक रूपयांच्या बनावट नोटा चलनात आणल्याचे पोलिसांना तपासात समजले आहे. बनावट नोटा तयार करण्यासाठी लागणारी सामग्री पोलिसांनी राकेशकडून जप्त केली आहे.
आरोपी मिता व राकेश या दोघांना पोलिसांनी अटक केली आहे. त्यांना न्यायालयीन कोठडी सुनावण्यात आली आहे. अधिक तपास स.पो.नि. सालगुडे करत आहेत.

पाहा व्हिडीओ -