यवतमाळ : छत्रपती शिवाजी महाराजांची तिथीप्रमाणे जयंती रविवारी यवतमाळ शहरासह जिल्ह्यात उत्साहात साजरी करण्यात आली. यानिमित्त विविध कार्यक्रमांचे आयोजन करण्यात आले होते. यवतमाळ शहरात सायंकाळी शोभायात्रा काढण्यात आली.यवतमाळात श्री शिवाजी मंडळाच्यावतीने शिवजयंतीनिमित्त सकाळी ५ वाजता शिवजन्मोत्सव सोहळ्याचे आयोजन येथील माळीपुरा परिसरात करण्यात आले होते. त्यानंतर छत्रपती दौड स्पर्धा घेण्यात आली. माळीपुरा येथून प्रारंभ झालेल्या या स्पर्धेत नागरिक मोठ्या संख्येने सहभागी झाले होते.सायंकाळी ६ वाजता माळीपुरा परिसरातून शोभायात्रेला प्रारंभ झाला. छत्रपती शिवाजी महाराजांच्या जीवनचरित्रावरील देखावे या शोभायात्रेत साकारण्यात आले होते. शिवाजीची वेशभूषा केलेले बालक सर्वांच्या आकर्षणाचे केंद्रबिंदू होते. ढोल-ताशांच्या गजरात निघालेल्या या मिरवणुकीत नागरिक मोठ्या संख्येने सहभागी झाले होते. शिवसेनेच्यावतीने शहरात मोटरसायकल रॅलीचे आयोजन करण्यात आले होते. पालकमंत्री संजय राठोड यांच्यासह अनेक शिवसैनिक या रॅलीत सहभागी झाले होते. (शहर वार्ताहर)
यवतमाळात शिवजयंती उत्साहात
By admin | Updated: March 9, 2015 01:43 IST