विनयभंग करणाऱ्या दोन आरोपींना कारावास

मूकबधीर असलेल्या अल्पवयीन मुलीचा विनयभंग करणाऱ्या दोन आरोपींना येथील जिल्हा व सत्र न्यायालयाने तीन वर्ष सश्रम कारावासाची शिक्षा ठोठावली.

तलावफैलातील घटना : जिल्हा सत्र न्यायालयाचा निकाल यवतमाळ : मूकबधीर असलेल्या अल्पवयीन मुलीचा विनयभंग करणाऱ्या दोन आरोपींना येथील जिल्हा व सत्र न्यायालयाने तीन वर्ष सश्रम कारावासाची शिक्षा ठोठावली. अतिरिक्त जिल्हा सत्र न्यायाधीश ए.पी. वानखडे यांनी हा निकाल दिला. आकाश भास्कर सहारे (२५), हरिश पांडुरंग गेडाम (२४) दोघे रा. तलावफैल असे शिक्षा झालेल्यांची नावे आहे. १५ आॅगस्ट २०१३ रोजी एका अल्पवयीन मुलीला घरात बोलावून या दोघांनी तिचा विनयभंग केला होता. सदर मुलीने घडलेला प्रकार इशाऱ्याने आईला सांगितले. तिच्या आईने शहर ठाण्यात तक्रार दिली. या प्रकरणाचा तपास सहायक पोलीस निरीक्षक तेजस्वीनी गिरसावळे यांनी पूर्ण करून दोषारोपपत्र दाखल केले. या खटल्यात पीडित मुलीचे बयान ग्राह्य धरण्यात आले. सदर मुलीचे बयान घेताना दूभाषकाची मदत घेण्यात आली. याशिवाय या खटल्यात दहा साक्षीदार तपासण्यात आले. सरकारी अभियोक्ता अ‍ॅड. नीती दवे यांनी युक्तीवाद केला. बाल लैंगिक अत्याचार प्रतिबंधक कायदा तसेच विनयभंगात तीन वर्षाची शिक्षा आणि प्रत्येकी सहा हजार दंड ठोठावण्यात आला. दंडातूनच नुकसानभरपाई पीडित मुलीला देण्याचे आदेश दिले आहे. (कार्यालय प्रतिनिधी)