वटफळीजवळ दोन तास रास्ता रोको

भरधाव ट्रकने दुचाकीला धडक दिल्याने झालेल्या अपघातानंतर संतप्त नागरिकांनी नेर-अमरावती मार्गावरील वटफळीजवळ तब्बल दोन तास रस्ता रोको आंदोलन केले.

नेर-अमरावती मार्ग : ट्रकच्या धडकेत तरुण गंभीर नेर : भरधाव ट्रकने दुचाकीला धडक दिल्याने झालेल्या अपघातानंतर संतप्त नागरिकांनी नेर-अमरावती मार्गावरील वटफळीजवळ तब्बल दोन तास रस्ता रोको आंदोलन केले. शुक्रवारी सायंकाळी ५ वाजता घडलेल्या या प्रकाराने वाहतूक ठप्प झाली होती. तर अपघातात गंभीर जखमी तरुणाला यवतमाळच्या शासकीय रुग्णालयात दाखल करण्यात आले. नाचणगाव येथून अमोल विनोद गुल्हाने (२७) रा. नबाबपुरा नेर हा दुचाकी एम.एच.२९-ए.एफ-९९१५ ने शुक्रवारी दुपारी नेरकडे येत होता. दरम्यान यवतमाळवरून सिमेंट घेऊन जाणारा ट्रक एम.एच.३४-७४६१ ने वटफळी बसस्थानकाजवळील वळणावर दुचाकीला धडक दिली. यात अमोल गंभीर जखमी झाला. त्याच्या डोक्याला व हातापायाला गंभीर दुखापत झाली. त्याला तत्काळ नेरच्या ग्रामीण रुग्णालयात उपचारासाठी दाखल करण्यात आले. मात्र प्रकृती चिंताजनक असल्याने त्याला अधिक उपचारासाठी यवतमाळला रवाना करण्यात आले आहे. दरम्यान या अपघाताचे तीव्र पडसाद वटफळी येथे उमटले. मनसेचे तालुका प्रमुख बाळासाहेब कठाडे, रोशन खोब्रागडे यांच्यासह शेकडो गावकऱ्यांनी गतिरोधकाच्या मागणीसाठी रस्ता रोको आंदोलन केले. तब्बल दोन तास या मार्गावरील वाहतूक रोखून धरण्यात आली होती. वटफळी येथील वळणावर जोपर्यंत गतिरोधक तयार केला जाणार नाही, तोपर्यंत आंदोलन सुरूच राहील, असे आंदोलक म्हणत होते. या वळणावर आतापर्यंत दहा ते पंधरा अपघात झाले आहे. अनेक दिवसांपासून गतिरोधकाची मागणी सुरू आहे. परंतु ती पूर्ण झाली नाही. त्यातच शुक्रवारी अपघात झाल्याने नागरिक संतप्त झाले. दरम्यान ठाणेदार गणेश भावसार व सार्वजनिक बांधकाम विभागाचे अभियंता पनपालिया यांनी आठ दिवसात गतिरोधक तयार करण्याचे आश्वासन दिल्याने आंदोलन मागे घेण्यात आले. त्यानंतर या मार्गावरील वाहतूक सुरळीत झाली. परंतु दोन तास वाहतूक ठप्प असल्याने नागरिकांना मनस्ताप सहन करावा लागला. (तालुका प्रतिनिधी)