लालबुंद सफरचंद आरोग्यास धोकादायक

फळांच्या दुकानातील लालबुंद दिसणारे सफरचंद सर्वांचेच आकर्षण असतात.

विदेशातून आयात : मेणबत्तीच्या घातक रसायनाचे कोटींग यवतमाळ : फळांच्या दुकानातील लालबुंद दिसणारे सफरचंद सर्वांचेच आकर्षण असतात. परंतु हेच आकर्षक सफरचंद मानवी आरोग्यासाठी प्रचंड हानीकारक असल्याचे आढळून आले आहे. अमेरिकेतून आयात होणाऱ्या या सफरचंदावर ते चमकावे (शायनिंग), जास्त दिवस टिकावे म्हणून मेणबत्तीच्या घातक रसायनांचे कोटींग केले जात असल्याचा धक्कादायक प्रकार उघडकीस आला आहे. फळांच्या बाजारात सफरचंदाला विशेष महत्व आहे. किमान २५० ते ३०० रुपये दराने हे सफरचंद विकले जाते. रुग्णांसाठी ऊर्जावर्धक व आरोग्यास उपयोगी असल्याने डॉक्टरही रुग्णाला अधिकाधिक सफरचंद देण्याचा सल्ला देतात. अशा वेळी गरीब परिस्थितीतही रुग्णाला सफरचंद देण्याचा प्रयत्न त्याच्या नातेवाईकांकडून केला जातो. परंतु हे आयात केलेले लालबुंद सफरचंद रुग्णासाठीच नव्हे तर मानवी आरोग्यास प्रचंड हानीकारक असल्याचे आढळून आले. दारव्हा येथील दिनेश कोठारी या जागरुक नागरिकाने लालबुंद सफरचंद घेऊन ‘लोकमत’ कार्यालय गाठले. त्याने या सफरचंदवर घातक मेणबत्तीचा दिलेला कोट उघडून दाखविला. पाहता पाहता एका सफरचंदवरील ब्लेडने काढलेली खूप मोठी पांढऱ्या रंगाची पावडर गोळा झाली. प्रत्येक सफरचंदमागे ही पावडर खाणाऱ्याच्या पोटात जाते. विशेष असे ती नष्ट होत नसल्याने आणि चिटकून राहत असल्याने आरोग्यास मोठा धोका निर्माण होतो. नेहमी लालबुंद सफरचंद खालल्यास अशा पावडरचा आपसुकच पोटात मोठा गोळा होण्याची शक्यता आहे. धोकादायक असलेल्या या सफरचंदचा प्रवास तपासला असता तो बहुतांश समुद्री मार्गे होत असल्याची माहिती मिळाली. आर्णी रोड स्थित क्वॉलिटी फ्रूट शॉपीचे संचालक अतुल मुक्कावार यांनी ‘लोकमत’ला सांगितले की, हे लालबुंद सफरचंद आॅस्ट्रेलिया, न्युझीलंड, अमेरिका, चीन या देशातून आयात केले जातात. अमेरिकेतून येणाऱ्या सफरचंदाला वॉशिंग्टन ही ओळख आहे. तर न्युझीलंडमधील सफरचंद रॉयल गाला या नावाने ओळखले जातात. चायना येथील सरफचंद अल्फापॅकर अशा नावाने ओळखतात. हे लाल सफरचंद अमेरिकेतील वॉशिंग्टन या भागात मोठ्या प्रमाणात पिकते. ते आकर्षक दिसावे व दीर्घ काळ टिकावे म्हणून त्यावर मेणबत्ती सारख्या रसायनाचा कोट (थर) चढविला जातो. त्यामुळे ते कायम ताजे व चकाकणारे दिसतात. जहाजातून ते भारतात आणले जातात. वास्तविक अशा केमिकल युक्त वस्तूंना बंदी आहे. मात्र त्यानंतरही बडे फ्रूट व्यापारी व तपासणी यंत्रणेच्या सलोख्याच्या संबंधामुळे हे सफरचंद भारतात ‘एन्ट्री’ मिळवितात. सफरचंदाचा साठा समुद्रात बुडविण्याची होती तयारी काही महिन्यांपूर्वी आयात होणाऱ्या सफरचंदांच्या गुणवत्तेवर अन्न व औषधी प्रशासन विभागाच्या अधिकाऱ्याच्या मुंबईतील अधिकाऱ्यांनी प्रश्न चिन्ह निर्माण केले होते. त्यानंतर सफरचंदांचा भला मोठा साठा मुंबईतील समुद्रात बुडविण्याची तयारी प्रशासनाने केली होती. मात्र ऐनवेळी व्यापाऱ्यांनी ‘तडजोड’ केल्याने हा वाद मिटला. वादापूर्वी २२०० रुपये दराने विकले जाणारे सफरचंद त्या ‘तडजोडी’नंतर २६०० रुपये दराने विकून ४०० रुपयांची मार्जीन प्रत्येक बॉक्सवर ठेवली गेली होती, अशी माहिती आहे. (जिल्हा प्रतिनिधी) भारतीय सफरचंदाला मोठी मागणी जगातील सर्वात चांगल्या सफरचंदाची निर्मिती भारतात होते. हिमाचल प्रदेश, जम्मू काश्मिर, कुल्लूमनाली, शिमला येथील सफरचंद प्रसिद्ध आहे. चंदीगडच्या सोलर मंडीतून हे सफरचंद देशभरात पाठविले जातात. भारतात निर्मिती होणाऱ्या सफरचंदाचा व्यापार सप्टेंबरला सुरू होऊन फेब्रुवारीपर्यंत चालतो. मार्चपासून विदेशातील सफरचंदाची एन्ट्री होते. ते जुलैपर्यंत चालतात. चीनमधील सफरचंद कमी किंमतीत उपलब्ध होतात.