२७ लाखांच्या चोरीतील संशयित : महागाव पोलिसांची कारवाई महागाव : फुलसावंगी येथील कापूस व्यापारी संदेश मुत्तेपवार यांच्या घरी झालेल्या २७ लाख रुपयांच्या चोरी प्रकरणात महागाव पोलिसांनी एका आरोपीला मुंबईतून अटक केली. अटकेतील आरोपी हा मूळ फुलसावंगी येथीलच रहिवासी आहे.फुलसावंगी येथील संदेश मुत्तेपवार यांच्या घरी ८ जानेवारी रोजी धाडसी चोरी झाली होती. चोरट्यांनी २७ लाख रुपये रोख आणि दोन तोळे सोने लंपास केले होते. तसेच तेवढीच रक्कम घटनास्थळी आढळून आली होती. त्यामुळे चोरटे गावातीलच असावे, असा कयास सुरुवातीपासून पोलिसांचा होता. संशयित असलेल्या आरोपींचा शोध महागाव पोलिसांनी सुरू केला होता. ठाणेदार प्रकाश शेळके यांच्या मार्गदर्शनात दुय्यम ठाणेदार गोसावी यांचे पथक मुंबईत गेल्या १५ दिवसांपासून तळ ठोकून होते. अखेर ठाणेदार गोसावी यांनी आरोपी आयाजोद्दीन ऊर्फ लखू आयसोद्दीन नबाब (२०) याला ताब्यात घेतले. मंगळवारी रात्री त्याला घेऊन पथक महागावात पोहोचले. बुधवारी सकाळी महागाव न्यायालयात हजर केले असता सात दिवसाची पोलीस कोठडी देण्यात आली. महागाव पोलीस त्याची कसून चौकशी करीत असून या चोरीत आणखी कोण-कोण आहे याचा तपासही सुरू आहे. (शहर प्रतिनिधी)
फुलसावंगीच्या लखूला मुंबईत अटक
By admin | Updated: January 28, 2016 02:30 IST