बोरी गदाजी येथे इसमावर चाकूहल्ला

सोनबा आनंद कोरझरे (४५) असे जखमी इसमाचे नाव आहे. शुक्रवारी रात्री सोनबा हे त्यांची दोन मुले अंकुश व मंगल यांच्यासोबत पानठेल्यावरून खर्रा घेऊन घराकडे जात होता. यावेळी आरोपीचा भाऊ मंगेश पंजाब उइके हा भेटल्याने तो त्याच्यासोबत बोलत असताना आरोपी विशाल पंजाब उईके याने मागावून येत चाकूने सोनबा कोरझरे याच्या छातीवर वार केले. यात सोनबा गंभीर जखमी होऊन खाली कोसळला. यावेळी आरोपी विशाल उइके व त्याचा भाऊ मंगेश उइके यांनी घटनास्थळावरून पळ काढला. जखमीच्या मुलांनी तत्काळ त्यांना येथील ग्रामीण रुग्णालयात उपचारासाठी दाखल केले. येथे त्यांच्यावर प्राथमिक उपचार केल्यावर पुढील उपचारासाठी जखमीला रात्रीच यवतमाळ येथील शासकीय रुग्णालयात दाखल केले. सध्या सोनबाची प्रकृती धोक्याबाहेर असल्याचे समजते. याप्रकरणी मारेगाव पोलिसांनी आरोपीविरोधात भादंवि कलम ३२६ नुसार गुन्हा दाखल करून त्याला अटक केली. नेमका चाकूने हल्ला कोणत्या कारणामुळे झाला, याचा तपास ठाणेदार जगदीश मंडलवार करीत आहेत.