हिवरी आरएफओ पुसद विभागातही वादात

यवतमाळ वन विभागातील हिवरी वन परिक्षेत्रात नियोजनच्या निधीतून झालेली तीन कोटींची जलयुक्त शिवारची कामे चौकशीच्या कक्षेत असतानाच पुसद विभागातील प्रकारही पुढे आला आहे.

८० लाखांची पाणलोटची कामे : तीन कोटींच्या जलयुक्त शिवारची कामे चौकशीत यवतमाळ : यवतमाळ वन विभागातील हिवरी वन परिक्षेत्रात नियोजनच्या निधीतून झालेली तीन कोटींची जलयुक्त शिवारची कामे चौकशीच्या कक्षेत असतानाच पुसद विभागातील प्रकारही पुढे आला आहे. हिवरीचे आरएफओ पुसदला कार्यरत असताना विदर्भ पाणलोटची ८० लाख रुपयांची कामे चांगलीच गाजली होती. संपूर्ण जिल्ह्यातच जलयुक्त शिवारच्या पाण्याची खळखळ पाहायला मिळते. वन खात्याने यवतमाळ विभागात जलयुक्त शिवारमध्ये एक रुपयाही निधी यंदा दिला नाही आणि कामेही झाली नाही. परंतु जिल्हा नियोजन समितीच्या सन २०१४-१५ या आर्थिक वर्षात जारी झालेल्या निधीतून जिल्हाभर मोठ्या प्रमाणात कामे घेतली गेली. कृषी विभाग व वन विभाग या दोनही खात्यांतर्गत झालेल्या कामांमध्ये प्रचंड घोळ आहे. भाजपा-शिवसेनेचे कार्यकर्तेच जलयुक्त शिवारच्या पाण्यात ‘चिंब’ झाले. यवतमाळलगतच्या हिवरी वन परिक्षेत्रात तीन कोटींची कामे जलयुक्त शिवारमध्ये केली गेली. त्यातील दीड कोटींची कामे भाजपाच्या दोन कार्यकर्त्यांच्या नावावर घेतली गेली. त्याची चर्चा सुरू असतानाच हिवरीचे आरएफओ एस.जी. हटकर यांची पुसदला वनपाल असतानाचे कारनामेही उघड होत आहे. पुसदला विदर्भ पाणलोटच्या ८० लाखांच्या कामात त्यांनी मोठ्या प्रमाणात गैरप्रकार केला होता. स्वत:च मशीनने कामे केली, ती निकृष्ट दर्जाची होती. या कामांच्या अभिलेख्यांचा (कॅश बुक) वाद चांगलाच गाजला होता. पुसदचे तत्कालीन वन परिक्षेत्र अधिकारी बी.के. चव्हाण यांनी पाणलोटच्या या कामांचे लेखे गहाळ केल्याची चर्चा यावेळी होती. या प्रकरणात एका वन मजुराच्या नेत्याने मध्यस्थी करून प्रकरण मिटविले होते. विशेष असे पुसद पाणलोट प्रकरणात हटकर आणि तत्कालीन पुसद डीएफओ जी.एस. बल्की यांना चार्जशिटसुद्धा दिली गेली होती. मात्र वरिष्ठ मेहेरबान झाल्याने त्यावेळी कारवाई टळली होती. त्याच हटकर यांच्या कारनाम्यांनी आता हिवरी वनपरिक्षेत्र गाजत आहे. हटकर यांचा यवतमाळ वन परिक्षेत्रावर डोळा आहे. येथील आरएफओ शंकर मडावी यांना हूसकून लावून त्यांच्या जागेवर वर्णी लावून घेण्याचा त्यांचा प्रयत्न आहे. त्याला पर्याय म्हणून त्यांनी उमरखेड वन परिक्षेत्र ठेवले आहे. त्यासाठी उमरखेडमध्ये भाजपाच्या गोटात हिवरीतून फिल्डींग लावली जात असल्याची माहिती आहे. (जिल्हा प्रतिनिधी)