मुलीला देहविक्री व्यवसायात लोटण्याचा डाव उधळला

किशोरवयीन मुलीच्या अल्लडपणाचा फायदा घेऊन तिला विकण्याच्या प्रयत्न यवतमाळ शहर पोलिसांच्या सतर्कतेने उधळला गेला.

शहर पोलिसांची सतर्कता : नागपूरला नेण्याची होती तयारी, महिला पसार सुरेंद्र राऊत यवतमाळकिशोरवयीन मुलीच्या अल्लडपणाचा फायदा घेऊन तिला विकण्याच्या प्रयत्न यवतमाळ शहर पोलिसांच्या सतर्कतेने उधळला गेला. यवतमाळ बसस्थानकावरून सदर मुलीला नातेवाईकांच्या मदतीने पोलिसांनी ताब्यात घेतले. तिला देहविक्री व्यवसायात ढकलण्याचा प्रयत्न असल्याचा संशय पोलिसांना आहे. लगतच्या मासोळी येथील नवव्या वर्गातील मुलगी १० जुलै रोजी बाहेर गेली. मात्र रात्र झाली तरी ती घरी परतली नाही. म्हणून घरच्यांनी तिचा शोध घेतला. थांगपत्ता लागत नसल्याने अखेर ११ जुलै रोजी यवतमाळ शहर पोलीस ठाण्यात तक्रार दिली. मुलीला फुस लावून दारव्हा येथील एका तरुणाने पळविल्याचे या तक्रारीत म्हटले होते. त्यावरून पोलिसांना सदर तरुणाला दारव्हा येथून ताब्यात घेतले. प्रत्यक्षात सदर मुलगी त्याच्याकडे गेलीच नसल्याचे निष्पन्न झाले. त्यामुळे पोलिसांच्या भुवया उंचावल्या. त्यांनी तपास सुरू केला. त्यावेळी तिच्या मोबाईलवरून प्रियकाराला येणाऱ्या फोनचा माग घेतला असता ती येथे बसस्थानक परिसरातच असल्याचे स्पष्ट झाले.सदर मुलगी दारव्हा येथे जाण्यासाठी यवतमाळ बस्थानकावर आली होती. त्यावेळी तिची ओळख एका महिलेशी झाली. तिला भावनीक साद घालून बसस्थानक परिसरालगतच्या एका रुमवर नेले गेले. तेथे तिला तब्बल सहा दिवस ठेवले. या काळात प्रियकर आणि आईवडीलांबाबत तिच्या मनात संशय निर्माण करण्यात आला. त्यामुळे ती अल्पवयीन मुलगी महिलेच्या सांगण्यावरून आईवडीलांना फोन करून खोटी माहिती देत होती. प्रियकरालाही सतत फोनवरून भेटायला ये, असे सांगत होती. प्रत्यक्षात मात्र भेटायला जात नव्हती. ही मुलगी त्या महिलेसोबत नागपूर येथे जाण्याच्या बेतात असताना पोलिसांनी तिच्या वडीलांना घेऊन १६ जुलै रोजी सकाळी सापळा रचला व तिला ताब्यात घेतले. ती महिला मात्र पसार झाली. तिला बालकल्याण समितीच्या स्वाधीन करण्यात आले आहे. यवतमाळातूनही मानवी तस्करीचा संशय मानवी तस्करी काय असते, हे मुलीला समजावून सांगण्यात आले. आईवडिलावर कोणताही रोष नसता केवळ दुर्लक्षामुळे घराबाहेर पडलेली मुलगी कुुटंणखाण्यात जाण्यापासून बचावली. ही कारावाई पोलीस उपनिरीक्षक हितेश राऊत व त्यांच्या पथकाने केली. पोलीस त्या महिलेचा शोध घेत आहेत. नागपूरात पोलिसांनी लावलेला सापळा एकदा अपयशी झाला आहे. यवतमाळातूनही मानवी तस्करी होत असल्याची दाट शक्यता या घटनेमुळे वर्तविली जात आहे. तसेच भरकटलेल्या मुलींना वेश्या व्यवसायत ओढणारे रॅकेट सक्रिय असल्याचे स्पष्ट झाले आहे.