मारहाणीत जखमी झालेल्या खापरीतील युवकाचा मृत्यू

३ ऑगस्ट रोजी रात्री ८ वाजेच्या सुमारास ही घटना घडली. फोनवर मोठ्याने का बोलतो, या क्षुल्लक कारणावरून हा वाद झाला होता. यात आरोपी संकेत हरिचंद्र पाचभाई, गौरव हरिचंद्र पाचभाई व संदीप भीमराव उरवते यांनी फिर्यादी प्रिया रूपेश कुचनकर यांचे पती रूपेश सुधाकर कुचनकर, महेश सुधाकर कुचनकर यांना लाथा व काठीने जबर मारहाण केली. यात सुधाकर कुचनकर यांची प्रकृती अस्वस्थ झाल्याने त्याला उपचारासाठी नागपूर येथील शासकीय रुग्णालयात भरती करण्यात आले होते. गुरुवारी रात्री मृत्यूशी झुंज दिल्यानंतर त्याचा मृत्यू झाला. त्याच्या पार्थिवार शुक्रवारी खापरी येथे अंत्यसंस्कार करण्यात आले. यातील आरोपीवर भादंवि कलम ३२६, ३२४, ३२३, २९४, ५०६, ३४ नुसार गुन्हा दाखल करून आरोपींना अटक केली. या आरोपींची यवतमाळ येथे रवानगी केली होती. आता या प्रकरणात खुनाचा गुन्हा दाखल होणार आहे.