पाच अटकेत : विद्यार्थ्यांचा सहभाग, नेटवर्कचा शोध
यवतमाळ : आयपीएल क्रिकेट सामन्यांचा फिव्हर सध्या सर्वत्र पहावयास मिळत आहे. तसा क्रिकेट सट्टा बाजारही तेजीत आला आहे. यामध्ये महाविद्यालयीन विद्यार्थ्यांचा सहभाग असल्याचे प्रथमच उघड झाले आहे. दारव्हा मार्गावरील नवदुर्गा अर्पामेंटमध्ये धाड टाकून पोलिसांनी सट्टा खेळणार्‍या पाच जाणांना ताब्यात घेतले. घटनास्थळावरून मिळालेल्या मोबाईलच्या माध्यमातून राज्यातील सटोड्यांच्या नेटवर्कचा सुगावा लावला जात आहे. रविवारच्या रात्री ९.३० वाजता सनरायझर्स हैद्राबाद विरूध्द कोलकत्ता नाईट रायर्डस असा सामना सुरू होता. यावर सट्टा लावला जात असल्याची गोपनीय माहिती मिळाली. यावरून उपविभागीय पोलीस अधिकारी राहुल मदने यांच्या विशेष पथकाने धाड टाकली. त्यावेळी आरोपी लतेश चमेडीया (२८) रा. बाजोरियानगर, प्रितेश रमाकांत कुसुमकर (२७), नवनीत शंकर पोदुतवार (२१), वैभव नारायण माहुरे (२५), पंकज अरूण साखरकर (२१) यांना ताब्यात घेतले. घटनास्थळावरून लॅपटॉप, नऊ मोबाईल, एलसीडी टीव्ही आणि रोख ९ हजार असा ७२ हजाराचा मुद्देमाल जप्त केला. शहरात बाहेरगावरून शिक्षणासाठी आलेल्या महाविद्यालयीन विद्यार्थांना हेरून हा व्यवसाय केला जात आहे. शहरातील काही प्रतिष्ठित व्यक्तीही यात समोर येण्याची शक्यता पोलिसांनी वर्तविली आहे. धाडीत मिळालेल्या मोबाईलवरून राज्यातील क्रिकेट सटोड्याचे कनेक्शन हाती लागते काय याचा तपास पोलीस करत आहे. ही कारवाई पोलीस उपनिरिक्षक संतोष माने यांच्या नेतृत्वात सहायक उपनिरीक्षक अजय ढोले, राहुल मनवर, संतोष मडावी, प्रमोद मडावी, तुषार नेवारे, इकबाल शेख यांनी केली. आठवड्याभरात आयपीएल सट्टयावर केलेली ही दुसरी कारवाई आहे. (कार्यालय प्रतिनिधी)