वाशिम विधानसभा मतदार संघात कुठे सभ्रंम, कुठे ओढाताण

आगामी विधानसभा निवडणूक तोंडावर असताना वाशिम-मंगरुळपीर हय़ा राखीव मतदारसंघात काही पक्षात संभ्रमावस्था निर्माण झाली आहे.

मंगरुळपीर : आगामी विधानसभा निवडणूक तोंडावर असताना वाशिम-मंगरुळपीर हय़ा राखीव मतदारसंघात काही पक्षात संभ्रमावस्था निर्माण झाली आहे. काँग्रेस-राष्ट्रवादीत अद्याप जागा वाटपाचेच गुर्‍हाळ सुरु असून मनसे, भारिप - बसपा या पक्षाचे संभाव्य इच्छुक उमेदवार कोण आहेत हे जरी उघड होत नसले तरी इच्छुकांची गर्दी सर्वच पक्षात होतांना दिसून येत आहे. भाजपामध्ये इच्छुकांची मोठी संख्या असल्याने चांगली ओढाताण होताना दिसून येत आहे. सर्वच राजकीय पक्षातील इच्छूक उमेदवारांनी आपापल्या परीने जनसंपर्क वाढविला आहे. सन २00९ साली परिसीमन आयोगाने केलेल्या मतदारसंघ पुनर्रचनेत मंगरुळपीर विधानसभा मतदारसंघ संपुष्टात येउन नव्याने वाशिम-मंगरुळपीर या मतदारसंघाची निर्मिती झाली. तसेच सदरचा मतदारसंघ अनुसूचित जाती प्रवर्गाकरीता राखीव झाला. २00९ च्या विधानसभा निवडणुकीत या ठिकाणी भाजपाचा उमेदवार विजयी झाला. यानंतर सन २0१४ ची विधानसभा निवडणूक तोंडावर आहे. आचारसंहिता लागू व्हायला काही दिवसांचा कालावधी शिल्लक असताना अनेक राजकीय पक्षांमध्ये शांतता दिसून येत आहे. नुकत्याच पार पडलेल्या लोकसभा निवडणुकीत केंद्रात भाजपने मिळविलेल्या एकहाती विजयामुळे या भाजपामध्ये उत्साहाचे वातावरण असले तरी तेवढे सोपे सुध्दा नाही. काँग्रेस इच्छूक उमेदवारांच्या मुलाखती मुंबई येथे पार पडल्या असून राष्ट्रवादी काँग्रेसमध्ये अद्याप जागा वाटपाचीच चर्चा सुरु आहे. तसेच प्रसंगी स्वबळावर लढण्याच्या वल्गना दोन्ही काँग्रेसचे नेते करीत आहेत. याचबरोबर आघाडीत वाशिम हा मतदारसंघ काँग्रेसच्या वाट्याला असून काँग्रेसमध्येही इच्छूकांची संख्या मोठी आहे. असे असताना राष्ट्रवादी काँग्रेसनेही या मतदारसंघावर दावा ठोकला असून राष्ट्रवादी कडे इच्छूक उमेदवार तयार आहेत. याचबरोबर मनसे, भारिप, भाजपा या पक्षांनीसुद्धा अद्याप त्यांचे उमेदवार घोषीत केले नसून या पक्षातील इच्छूकांची संख्या मात्र सर्वच पक्षात मोठी दिसून येत आहे.