वाटमारी करणा-या दोघांना ग्रामस्थांनी पकडले

पाच चोरट्यांपैकी दोघांना रंगेहात पकडले; वाशिम तालुक्यातील पांडव उमरा फाट्यावरील घटना.

वाशिम : वाटमारी करून पसार होण्याचा प्रयत्न करणार्‍या पाच चोरट्यांपैकी दोघांना रंगेहात पकडल्याची घटना वाशिम तालुक्यातील पांडव उमरा फाट्यावर १४ जुलै रोजी रात्री ८.३0 वाजता घडली. दोन्ही चोरट्यांना ग्रामस्थांनी ग्रामीण पोलिसांच्या हवाली केले. वाशिम ते शेलूबाजार मार्गावर अज्ञात पाच चोरट्यांनी तांदळी शेवई येथील वासुदेव दत्तुजी भुसारे यांची पांडव उमरा फाट्यावर मोटरसायकल अडवून बेदम मारहाण केली. या चोरट्यांनी भुसारे यांच्याजवळील रोख २३00 रुपये व मोबाइल हिसकावून मोटरसायकलने पळ काढला. तथापि, जखमी झालेल्या भुसारे यांनी आपली आपबीती तांदळी शेवई व पांडव उमरा येथील ग्रामस्थांना सांगितली. लगेचच दोन्ही गावांतील १५ ते २0 लोकांनी चोरट्यांचा शोध घेण्यासाठी सापळा रचला. या सापळ्यात मंगरूळपीर तालुक्यातील इचोरी येथील बबलू ऊर्फ गणेश प्रकाश वाघमारे व अमोल देवराव घोडगे या दोघांना रंगेहात पकडण्यात यश मिळविले. ग्रामस्थांना चकमा देऊन तीन अनोळखी चोरटे पळ काढण्यात यशस्वी झाले. या घटनेची माहिती तात्काळ ग्रामस्थांनी ठाणेदार विनायक जाधव यांना कळविली. पोलिसांनी वाघमारे व घोडगे या दोघांना ताब्यात घेऊन त्यांचेविरूध्द भादंविचे कलम ३९५ अन्वये गुन्हा दाखल केला. ग्रामस्थांनी एकजूट होऊन चोरट्यांना रंगेहात पकडल्याने त्यांचे सर्वत्र कौतुक होत आहे.