क्षुल्लक वादातून इसमाचा बळी

बुलडाणा तालुक्यातील घटना; आरोपीविरुद्ध गुन्हा दाखल.

पिंपळगाव सैलानी (बुलडाणा) : क्षुल्लक कारणातून वाद होऊन झालेल्या हाणामारीत संजय अश्रुबा जंजाळ(४0) हा इसम जखमी झाला होता. ही घटना बुलडाणा तालुक्यातील मातला येथे २८ ऑक्टोबर रोजी रात्री घडली होती. आज सकाळी १0 वाजेच्या सुमारास जखमी इसमाचा उपचारादरम्यान औरंगाबाद येथे मृत्यू झाला. सखूबाई संजय जंजाळ यांच्या फिर्यादीवरुन रायपूर पोलिसांनी आरोपीविरुद्ध गुन्हा दाखल केला आहे. मातला येथील मृतक संजय जंजाळ २८ ऑक्टोबर रोजी उंबरखेड रस्त्यावर गुरे चारत होता. या दरम्यान शेतात काम करीत असलेल्या मनोहर शंकर तायडे यांच्याशी मृतक संजयची शाद्बिक चकमक झाली. पुढे याचे वादात रुपांतर होऊन हाणामारीपर्यंत प्रकरण गेले. यात मनोहर तायडे याने संजयच्या डोक्यात लोखंडी सळईने मारुन जखमी केले, अशी माहिती मृतकाच्या नातेवाइकांकडून मिळाली. गंभीर जखमी अवस्थेत संजय जंजाळ याला नातेवाइकांनी तत्काळ औरंगाबाद येथील सामान्य रुग्णालयात दाखल केले; मात्र उपचारा दरम्यान संजयचा आज सकाळी १0 वाजेच्या सुमारास मृत्यू झाला. मृतकांच्या मागे पत्नी व मुलगा असा परिवार आहे. या प्रकरणाची चौकशी सुरु आहे. अद्याप तक्रार प्राप्त न झाल्यामुळे कोणावरही गुन्हा दाखल झाला नसल्याची माहिती रायपूर पोलीस स्टेशनचे ठाणेदार भूषण गांवडे यांनी सांगितली.