वाशिममार्गे अमरावती, यवतमाळ, पुणे, अकोला, नांदेड, नागपूर यासह इतरही मोठमोठ्या शहरांमध्ये सुमारे २५ ट्रॅव्हल्सच्या माध्यमातून प्रवाशांची वाहतूक केली जाते. २०२० या संपूर्ण वर्षात मात्र जवळपास नऊ महिने व्यवसाय पूर्णत: ठप्प झालेला होता. ५० टक्के क्षमतेने प्रवासी वाहतुकीचा हा व्यवसाय हळूहळू पूर्वपदावर येत असतानाच फेब्रुवारी महिन्यापासून पुन्हा रुग्णसंख्येत मोठ्या प्रमाणात वाढ व्हायला लागली. त्याचा थेट परिणाम होऊन प्रवाशांच्या संख्येत कमालीची घट झाली आहे. गेल्या काही दिवसांपासून मोठ्या ‘स्लीपर कोच ट्रॅव्हल्स’लाही ५ ते १० प्रवासीच मिळत असल्याची वस्तुस्थिती आहे. यामुळे डिझेलचाही खर्च वसूल होणे कठीण झाल्याची माहिती ट्रॅव्हल्स मालकांनी दिली.
..............
कोरोनाआधी रोज बाहेरगावी जाणाऱ्या ट्रॅव्हल्सची संख्या - २५
सध्याची संख्या - १०
...........
बाॅक्स :
गाडी रूळावर येत होती, पण...
कोरोना विषाणू संसर्गाच्या संकटामुळे गतवर्षी जवळपास नऊ महिने प्रवासी वाहतुकीचा व्यवसाय थांबला होता. तो हळूहळू पुन्हा रूळावर येत होता. ट्रॅव्हल्सही आता ५० टक्के क्षमतेने धावू लागल्या होत्या. गेल्या काही दिवसांपासून मात्र पुन्हा कोरोना रुग्णसंख्येत मोठ्या प्रमाणात वाढ होऊ लागल्याने चिंता वाढली आहे.
..........
बॅंकेचे हप्ते थकले
३८ ते ४० लाख रुपये कर्ज घेऊन ट्रॅव्हल्स विकत घेतली. त्याचे हप्ते फेडणे सुरू आहे. अशात उद्‌भवलेल्या कोरोनाच्या संकटामुळे गतवर्षी व्यवसाय पूर्णत: ठप्प झाला. गाड्या जागीच उभ्या ठेवाव्या लागल्या. यामुळे टायरवर चिरा पडण्यासह बॅटरी उतरली. यामुळे ३ लाखांचा फटका बसला. आताही प्रवाशांची संख्या १० ते १५ टक्क्यांवर आलेली आहे. यामुळे बॅंकेचे हप्ते थकले आहेत.
- पप्पू चरखा
ट्रॅव्हल्स मालक, वाशिम
.......
ट्रॅव्हल्स मालक कोरोनामुळे संपण्याच्या मार्गावर आहेत. हा व्यवसाय पुरता अडचणीत सापडला असून, डिझेलचाही खर्च वसूल होणे अशक्य झाले आहे. व्यवसायाची घडी पूर्णत: विस्कळित होऊ नये, यासाठी गाड्या सुरू ठेवाव्या लागत आहेत; मात्र हा संयमही फार काळ टिकू शकणार नाही. कोरोनाच्या संकटाने ट्रॅव्हल्स मालकांसोबतच शेकडो कामगारांनाही अडचणीत टाकले आहे.
- रवि बुंदे
ट्रॅव्हल्स मालक, वाशिम
.........
कोरोनाच्या संकटामुळे ट्रॅव्हल्सला प्रवासी मिळेनासे झाले आहेत. यामुळे परजिल्ह्यात धावणाऱ्या अनेक ट्रॅव्हल्स बंद ठेवाव्या लागत आहेत. ज्या सुरू आहेत, त्यांनाही मोठ्या प्रमाणात नुकसान होत असल्याने व्यवसाय परवडेनासा झाला आहे. शासनाचेही काही बाबींमध्ये धोरण चुकत आहे. एकूणच या सर्व प्रतिकूल बाबींमुळे ट्रॅव्हल्स मालक अडचणीत सापडले आहेत.
- सत्यनारायण शर्मा
अध्यक्ष, बस वाहतूक संघटना