तंटामुक्ती पुरस्काराची रक्कम हडपली

माजी उपसरपंचाचा आरोप : सीईओंना निवेदन

मानोरा : मानोरा पंचायत समिती अंतर्गत येत असलेल्या ग्राम उमरी खुर्द येथील सरपंच व सचिव यांनी उपलब्ध असलेल्या महात्मा गांधी तंटामुक्त गाव समिती पुरस्काराची रक्कम व विविध योजनेच्या रकमेची संगनमत करून अपहार केल्याचा आरोपी उमरी खुर्द येथील माजी सरपंच श्रीराम चिल्या जाधव यांनी मुख्य कार्यपालन अधिकारी जि.प. वाशिम यांना दिलेल्या निवेदनाद्वारे केली असून, अपहार करणार्‍याविरुद्ध योग्य ती कायदेशीर कार्यवाही करावी, अशी मागणी करण्यात येत आहे. मुख्य कार्यपालन अधिकारी यांना दिलेल्या निवेदनात जाधव यांनी असे म्हटले आहे की, ते उमरी खुर्द या ग्रामपंचायतचे माजी उपसरपंच असून, गावाचा विकास व्हावा, अशी त्यांची तळमळ असल्याने ते सदैव ग्रामपंचायतीच्या ग्रामसभेस आवर्जुन उपस्थित असतात. मागील झालेल्या सभेमध्ये सन २0१३-१४ मध्ये ग्रामपंचायत उमरी खुर्दला महात्मा गांधी तंटामुक्त गाव समितीला तीन लाख रुपयांचे बक्षीस मिळाले होते; पण सदर बक्षिसाच्या रकमेचे विकासाच्या दृष्टीने विनियोग न करता संगनमताने सचिव व सरपंच यांनी भ्रष्टाचार करून अपहार केल्याचा आरोप करून महाराष्ट्र ग्रामीण रोजगार हमी योजनेतून शतकोटी वृक्षलागवड करण्यात आल्याचे दाखवून आपली मजुरांच्या नावे रक्कम काढून अपहार केला असल्याचे निवेदनात म्हटले आहे. उमरी खुर्द येथील अजाब बाबुराव जाधव यांच्या गल्लीतील रस्ता पूर्ण केल्याचे दाखविले. प्रत्यक्षात तेथे कोणत्याच प्रकारचा रस्ता केला नाही. तेव्हा सदर जागेचे स्थळ निरीक्षण करून पाहणी करण्यात आली, असे निवेदनात म्हटले आहे. पुढे त्यांनी निवेदनात असे म्हटले आहे की, वसंतनगरजवळील रस्ता जेसीबी मशीनने पूर्ण करून खोट्या मजुरांच्या नावे पैसे काढून कमी पैशात रस्ता पूर्ण करून उपलब्ध रकमेचा अपहार केला आहे. एक महिन्यापूर्वी मी ग्रा.पं. संबंधी सन २0१३-१४ च्या काम व खर्चाबाबत विचारणा केली असता संबंधित सचिव यांनी उडवाउडवीची उत्तरे देऊन हिशोब दिला नाही. अशा पद्धतीचा आरोप जाधव यांनी केला असून, ग्रामपंचायतच्या रेकॉर्ड पाहणी तसेच हिशोबाची रितसर चौकशी करून अपहार व भ्रष्टाचार करणार्‍या सरपंच व सचिव यांच्यावर योग्य ती कायदेशीर कार्यवाही करावी, अशी मागणी केली आहे. निवेदनाच्या प्रती गटविकास अधिकारी पंचायत समिती मानोरा यांना पाठविण्यात आलेल्या आहेत. उमरी खुर्दप्रमाणे इतरही ग्रामपंचायतीची रेकॉर्ड तपासणी व केलेल्या कामाची चौकशी करण्यात यावी अशी मागणी तालुक्यातील जनतेतून करण्यात येत आहे. दरम्यान, या संदर्भात मानोरा पंचायत समितीचे ज्येष्ठ विस्तार अधिकारी बी.ए. अवघण यांनी ग्रामपंचायतच्या विकासकामासंदर्भात तक्रार कार्यालयात प्राप्त झाली असून, चौकशी करून पुढील कार्यवाही करू अशी प्रतिक्रिया दिली आहे.