शेलूबाजारची बाजारपेठ कडकडीत बंद

शेलूबाजार येथे वाढत असलेल्या कोरोना संसर्गाच्या पार्श्वभूमीवर मंगरुळपीर उपविभागीय अधिकारी प्रकाश मुळे यांनी ग्रामपंचायत कार्यालयात १८ मार्च रोजी बैठक घेतली. शेलूबाजार येथे व्यापारी व कामगारांच्या केलेल्या चाचणीत ४८ व्यक्ती पॉझिटिव्ह आढळून आल्या आहेत. त्यामुळे पुढील धोका टाळण्यासाठी व ग्रामीण भागात परिणाम होऊ नये म्हणून बाजारपेठ २० मार्च ते २४ मार्चपर्यंत ५ दिवसांसाठी अत्यावश्यक सेवा वगळता लॉकडाऊन करण्याचे आदेश त्यांनी निर्गमित केले. या आदेशानुसार शेलूबाजार गावातील अंतर्गत सर्व रस्ते बॅरिकेड्स लावून पोलिसांनी बंद केले आहे. परिसरात जनतेला फिरण्यास बंदी आहे. केवळ नागपूर-औरंगाबाद आणि अकोला-मंगरुळपीर मार्गावरील वाहतूक सुरू आहे; परंतु या मार्गावर कोणतेही वाहन थांबविण्यास मनाई करण्यात आली आहे. या आदेशाचे कठोर पालन केले जात असून, बाजारपेठ कडकडीत बंद, तर गावात शुकशुकाट दिसत आहे.