कोरोना संसर्गाच्या संभाव्य तिसऱ्या लाटेला तोंड देण्यासाठी जिल्ह्यात जास्तीत जास्त नागरिकांचे लसीकरण करण्यावर भर दिला जात आहे. याकरिता जिल्ह्यात १३४ केंद्रांवर लसीकरण मोहीम राबविली जात आहे. सध्या १८ वर्षांवरील सर्व नागरिकांना लसीकरणाची सुविधा उपलब्ध करून देण्यात आली असून त्यांना कोविशिल्ड व कोव्हॅक्सिन लसीचा पहिला डोस लसीच्या उपलब्धतेनुसार दिला जात आहे. मात्र, यापूर्वी ज्यांनी कोव्हॅक्सिन लसीचा पहिला डोस घेतला आहे, अशा १८ वर्षांवरील सर्व व्यक्तींना कोव्हॅक्सिन लसीच्या दुसऱ्या डोससाठी पुरेसा साठा सर्व १३४ लसीकरण केंद्रांवर उपलब्ध करून देण्यात आला आहे. त्यामुळे कोव्हॅक्सिन लसीचा पहिला डोस घेऊन २८ दिवस पूर्ण झालेल्या नागरिकांनी आपल्या नजीकच्या लसीकरण केंद्रावर जाऊन लसीचा दुसरा डोस घ्यावा.
------------------
दोन्ही लसी सारख्याच परिणामकारक व सुरक्षित : जिल्हाधिकारी श्णमुगराजन एस.
कोरोनापासून बचाव करण्यासाठी कोरोनावरील लस हा प्रभावी उपाय आहे. त्यामुळे लसीबद्दल मनात असलेला गैरसमज दूर करून १८ वर्षांवरील प्रत्येकाने कोरोना प्रतिबंधक लस घेण्यासाठी पुढे यावे. कोव्हॅक्सिन आणि कोविशिल्ड या दोन्ही लसी सुरक्षित असून त्या सारखेच काम करतात. रुग्णाला लस दिल्यानंतर दोन्ही लसीचा फायदासुद्धा एकसारखाच होतो. कोरोना लसीसंदर्भात पसरत असलेल्या अफवांवर विश्वास ठेवू नका. ज्यांनी लसीचा पहिला डोस घेतला आहे, त्यांनी विहित कालावधीत दुसरा डोस घेऊन स्वतःला सुरक्षित करावे. तसेच अद्याप एकही डोस न घेतलेल्या नागरिकांनी नजीकच्या लसीकरण केंद्रावर जाऊन लस घ्यावी, असे आवाहन जिल्हाधिकारी श्णमुगराजन एस. यांनी केले आहे.
...............
विहीत कालावधीत दुसरा डोस घेणे गरजेचे : जिल्हा आरोग्य अधिकारी डॉ. अविनाश आहेर
कोरोना प्रतिबंधक लस घेतल्यानंतर कोरोना विषाणू संसर्गाशी लढण्यासाठी रोगप्रतिकारशक्ती आपल्या शरीरात निर्माण होते. पुरेशा प्रमाणात रोगप्रतिकारशक्ती निर्माण होण्यासाठी लसींचे दोन्ही डोस विहीत कालावधीत घेणे गरजेचे आहे. त्यामुळे कोव्हॅक्सिन लसीचा पहिला डोस घेतलेल्या नागरिकांनी २८ दिवसानंतर कोव्हॅक्सिन लसीचा दुसरा डोस, तसेच कोविशिल्ड लसीचा पहिला डोस घेतलेल्या नागरिकांनी ८४ दिवसांनी कोविशिल्ड लसीचा दुसरा डोस घ्यावा. जिल्ह्यातील १३४ लसीकरण केंद्रांवर पहिल्या व दुसऱ्या डोससाठी पुरेशा लसी उपलब्ध आहेत, अशी माहिती जिल्हा आरोग्य अधिकारी डॉ. अविनाश आहेर यांनी दिली.
............
दोन्ही डोस घेतल्यानंतरच पुरेशी रोगप्रतिकारशक्ती
जिल्ह्यातील २१ हजार नागरिक दुसऱ्या डोससाठी पात्र
सर्व केंद्रांवर १८ वर्षांवरील नागरिकांसाठी पहिला डोसही उपलब्ध