वाशिम : वाशिम व मंगरूळपीर तालुक्यातील कृषिसेवा केंद्रांची झाडाझडती घेतली असता, रिलिज ऑर्डर व आवश्यक ती कागदपत्रे आढळून न आल्याने सोयाबीनच्या १८४६ बॅग तसेच कापूस बियाणाच्या २७० पॅकेटची विक्री बंदचे आदेश कृषी विभागाने गुरुवारी दिले आहेत. या कारवाईमुळे कृषिसेवा केंद्रांचे धाबे दणाणले असून, अनियमितता करणाऱ्यांची गय केली जाणार नसल्याचा स्पष्ट इशाराही कृषी विभागाने दिला आहे.
खरीप हंगाम तोंडावर आला असून, शेतकऱ्यांची गैरसोय तसेच फसवणूक होऊ नये म्हणून कृषी विभागातर्फे कृषिसेवा केंद्रांची झाडाझडती घेतली जात आहे. जिल्हा अधीक्षक कृषी अधिकारी शंकर तोटावर यांच्या मार्गदर्शनात जिल्हा गुणवत्ता नियंत्रण निरीक्षक रमेश भद्रोड यांच्या पथकाने १९ मे रोजी वाशिम शहरातील तीन कृषिसेवा केंद्रांची झाडाझडती घेतली. तपासणीदरम्यान १८ मे २०२१ रोजी विविध आठ कंपन्यांच्या पुरवठा झालेल्या सोयाबीन बियाणाचे आवश्यक दस्ताऐवजाची मागणी केली असता दस्ताऐवज उपलब्ध झाले नाहीत. यामुळे सोयाबीनच्या १८४६ बॅगची (किंमत ४४.९० लाख) विक्री थांबविण्यात आली आहे. या साठ्यास विक्री बंदचे आदेश देतानाच, पुढील तीन दिवसात आवश्यक कागदपत्रे, रिलिज ऑर्डर दाखविण्यात यावी अन्यथा पुढील कारवाई करण्याचा इशारा कृषी विभागाने दिला. २० मे रोजी मंगरूळपीर येथील चार कृषिसेवा केंद्रांची तपासणी केली असता, रिलिज ऑर्डर व अन्य कागदपत्रे आढळून न आल्याने सोयाबीनच्या ३०० बॅग तसेच कापूस बियाणाची २७० पॅकेटला विक्री बंदचे आदेश दिले. बियाणे नमुने तपासणीसाठी बियाणे चाचणी प्रयोगशाळेत पाठविण्यात आले आहेत. ही कारवाई करताना जिल्हा गुणवत्ता नियंत्रण निरीक्षक भद्रोड यांच्यासमवेत तंत्र अधिकारी प्रकाश पल्लेवाड उपस्थित होते.
०००
‘रिलिज ऑर्डर’ बंधनकारक !
विविध कंपन्यांचे सोयाबीन, कपाशी बियाणे विक्रीसाठी बाजारात आले आहे. बियाणे खरेदी केल्यानंतर यासंदर्भातील रिलिज ऑर्डर, बिल अशी कागदपत्रे असल्याशिवाय बियाणांची विक्री करू नये, अशा स्पष्ट सूचना कृषी विभागाने यापूर्वीच दिल्या आहेत. या सूचनांची अंमलबजावणी होते की नाही याची पडताळणी म्हणून जिल्हा गुणवत्ता नियंत्रण यंत्रणेकडून कृषिसेवा केंद्रांची झाडाझडती घेण्यात येत आहे. गत दोन दिवसांत सात कृषिसेवा केंद्रांकडे रिलिज ऑर्डर व बिल अशी कागदपत्रे आढळून आली नाहीत. रिलिज ऑर्डर बंधनकारक असून, कृषिसेवा केंद्रांनी याचे पालन करावे अन्यथा कारवाईला सामोरे जावे, असा इशारा कृषी विभागाने दिला.
००००००००