जिल्ह्यात ३ एप्रिल रोजी कोरोनाचा पहिला रुग्ण आढळून आला होता. जून ते सप्टेंबर या कालावधीत जिल्ह्यात कोरोनाबाधितांची संख्या वाढली. नोव्हेंबर ते जानेवारी या महिन्यात कोरोनाचा आलेख खाली आल्याने जिल्हावासीयांना दिलासा मिळाला. कोरोनाची सौम्य लक्षणे असणाऱ्या रुग्णांना गृहविलगीकरणाचा पर्याय उपलब्ध करून देण्यात आला. त्यामुळे प्रत्यक्ष रुग्णालयात उपचार घेणाऱ्या रुग्णांची संख्या कमालीची घटली होती. दरम्यान, गत १० दिवसांपासून कोरोनाबाधितांची संख्या वाढली आहे. जवळपास ८ ते १० टक्के रुग्णांमध्ये कोरोनाची तीव्र लक्षणे आढळून येत असल्याने त्यांना सरकारी तसेच खासगी कोविड रुग्णालयात उपचारार्थ दाखल करण्यात येते. जानेवारी महिन्याच्या तुलनेत अलिकडच्या काळात रेमेडीसिवर इंजेक्शनचा वापर काही प्रमाणात वाढल्याचे दिसून येते. ऑक्सिजनची गरज असलेले १५ रुग्ण आहेत. कोरोनाचा कहर सुरू असल्याने रेमेडीसिवर इंजेक्शनचा तुटवडा निर्माण होऊ नये म्हणून आरोग्य विभाग अलर्ट झाला असून, मुबलक प्रमाणात रेमेडीसिवर इंजेक्शन व अन्य औषधी साठाही उपलब्ध करण्यात आल्याचे आरोग्य विभागाने स्पष्ट केले. जिल्ह्यात सध्या जवळपास ५०० रेमेडीसिवर इंजेक्शन उपलब्ध आहेत.
०००
सौम्य लक्षणे असणारे रुग्ण गृह विलगीकरणात आहेत. सरकारी रुग्णालयांमध्ये तीव्र लक्षणे असणारे रुग्ण उपचारार्थ आहेत. रेमडेसिवर इंजेक्शनसह आवश्यक त्या औषधाचा साठा जिल्ह्यात मुबलक प्रमाणात उपलब्ध आहे.
- डॉ. मधुकर राठोड,
जिल्हा शल्य चिकित्सक, जिल्हा सामान्य रुग्णालय
००
मुबलक प्रमाणात औषध उपलब्ध
गत १० दिवसांपासून कोरोनाचा आलेख प्रचंड झेपावत असल्याचे दिसून येते. खबरदारीचा उपाय म्हणून चाचण्यांची संख्या वाढविण्याच्या सूचना जिल्हाधिकारी शण्मुगराजन एस. यांनी आरोग्य यंत्रणेला दिलेल्या आहेत. त्यानुसार जिल्ह्यात अॅन्टिजेन टेस्ट, अन्य औषध साठाही मुबलक प्रमाणात उपलब्ध असल्याचे आरोग्य विभागाने स्पष्ट केले.