शिरपूर जैन : १६ फेब्रुवारी रोजी संपन्न झालेल्या ग्रामपंचायत सरपंचपदाच्या निवडणुकीत राजकन्या संतोष अढागळे यांची सरपंचपदी तर उपसरपंचपदी असलम परसुवाले यांची बिनविरोध निवड करण्यात आली.
जिल्ह्यातील सर्वात मोठी ग्रामपंचायत असलेल्या शिरपूर ग्रामपंचायतच्या सार्वत्रिक निवडणुकीत १७ पैकी १२ सदस्य हे शिवसेना उपजिल्हाप्रमुख अशोकराव अंभोरे यांचे क्रांती पॅनल, अशोकराव देशमुख यांची तिसरी आघाडी व सलीम गवळी यांच्या जय हो पॅनलचे निवडून आले आहेत. येथील सरपंचपदाचे आरक्षण अनुसूचित जातीसाठी आरक्षित होते. यात राजकन्या अढागळे या एकमेव अनुसूचित जातीमधून निवडून आलेल्या सदस्य आहेत. विरोधी एकता गटातून केवळ पाच सदस्य निवडून आले. त्यातही सिंधू कांबळे यांनी निवडणूक प्रक्रिया सुरू होण्यापूर्वी सत्ताधारी गटात प्रवेश केला. त्यामुळे १६ फेब्रुवारीला झालेल्या सरपंच पदाच्या निवडणुकीत राजकन्या यांचाच राजयोग बिनविरोध आला. तर उपसरपंचपदी असलम परसुवाले यांची सलग दुसऱ्यांदा निवड झाली. त्यामुळे शिरपूर ग्रामपंचायतवर शिवसेना उपजिल्हाप्रमुख अशोकराव आंभोरे, तिसऱ्या आघाडीचे अशोकराव देशमुख व जय हो गटाचे सलीम गवळी यांच्या गटाचा झेंडा फडकला. सरपंच उपसरपंच निवडीनंतर कार्यकर्त्यांनी जल्लोष केला व नवनिर्वाचित सरपंच-उपसरपंचांचा सत्कार केला. सरपंचत-उपसरपंच निवडणूक अध्यासी अधिकारी म्हणून पुरवठा निरीक्षक रवी राऊत यांनी व ग्राम विकास अधिकारी भागवत भुरकाडे यांनी काम पाहिले. (वा.प्र.)