सत्ताधा-यांकडेच सभापतिपद!

मालेगावात भाजपा तर मानो-यात राकाँ व काँग्रेस सत्तेत सहभागी झाले आहेत.

वाशिम: मालेगाव व मानोरा नगर पंचायत अध्यक्ष-उपाध्यक्ष पदाच्या निवडणुकीनंतर १४ फेब्रुवारीला विषय समिती सभापतींची निवडणूक झाली. सभापती पदाच्या निवडणुकीत सत्ताधार्‍यांना यश मिळाले असले तरी काही ठिकाणी आघाडीबाहेरच्या पक्षाला सभापतिपद सोडावे लागले. मालेगाव येथे भाजपा आणि मानोरा येथे राकाँ व काँग्रेस सत्तेत सहभागी झाले आहेत. मालेगाव: मालेगाव नगर पंचायतीत राष्ट्रवादी व काँग्रेस व शिवसंग्रामचे प्रत्येकी चार, भाजपाचे एक व अपक्ष एक असे मिळून १७ सदस्य निवडून आले होते. काँग्रेस-राष्ट्रवादी काँग्रेस आघाडीने अपक्षाच्या मदतीने सत्ता स्थापन केली. राकाँच्या मीनाक्षी परमेश्‍वर सावंत या अध्यक्ष तर काँग्रेसचे गोपाल मानधने हे उपाध्यक्ष झाले. रविवारी विषय समिती सभापती पदासाठी निवडणूक झाली. काँग्रेस-राष्ट्रवादी काँग्रेस व अपक्ष यांनी सत्ता हस्तगत केल्यानंतर, सभापती पदाच्या निवडणुकीत सूचक व अनुमोदक कोण? यावरून बरीच चर्चा झाली. सभापती पदासाठी काँग्रेसकडून अफसाना बी सय्यद तस्लीम व रेहान चौधरी, भाजपाकडून किशोर महाकाळ व अपक्ष सदस्य शहानूर बी सत्तार शाह यांचा अर्ज आला. राष्ट्रवादी काँग्रेसला अध्यक्षपद आणि नामनिर्देशित सदस्य पद दिल्याने दोन पदे काँग्रेस, एक भाजपा व एक अपक्ष अशी बोलणी झाल्याचे वृत्त आहे. यानुसार सभापतिपदी काँग्रेस दोन, भाजपा एक व अपक्ष एक अशा चार सदस्यांची वर्णी लागली. महिला व बालकल्याण सभापतिपदी काँग्रेसच्या अफसाना बी सय्यद तस्लीम, पाणीपुरवठा सभापतिपदी रेहान चौधरी तर भाजपाचे किशोर महाकाळ यांच्याकडे आरोग्य आणि अपक्ष असलेले शहानूर बी सत्तार शाह यांच्याकडे बांधकाम सभापतिपद आले. मानोरा: मानोरा नगर पंचायतीच्या सभापतींची निवडणूक १४ फेब्रुवारी रोजी कारंजा उपविभागीय अधिकारी डॉ. शरद जावळे यांच्या उपस्थितीत पार पडली. सर्व सभापतींची निवडणूक अविरोध झाली असून, काँग्रेस व राष्ट्रवादी काँग्रेस सत्तेत सहभागी झाली आहे. अध्यक्षपदी रेखा शामराव पाचडे, उपाध्यक्ष तथा महिला व बालविकास समितीच्या सभापतिपदी निखतजबीन रशिदखान पठाण, तर आरोग्य सभापतिपदी शेख वहीद शेख अय्युब, सार्वजनिक बांधकाम सभापतिपदी सुनेहरा परविन विहिदोद्दिन शेख, तर पाणीपुरवठा व मलनिसारण सभापतिपदी गणेश परशराम भोरकडे यांची निवड करण्यात आली.