महाराष्ट्रात कोरोनाच्या रुग्णवाढीला ब्रेक लागला आहे. कोरोनाचा कहर कमी झाल्यानंतर आता राज्यात अनलॉकची प्रक्रिया सुरू झाली आहे. दरम्यान, कोरोनाकाळात बंद असलेले शाळेचे दरवाजे राज्यातील विद्यार्थ्यांसाठी पुन्हा एकदा उघडण्याची शक्यता आहे. राज्यातील कोरोनामुक्त भागातील आठवी ते बारावीपर्यंतचे वर्ग उघडण्याचा निर्णय घेण्यात आला आहे. तथापि, अशाप्रकारे शाळा सुरू करण्याबाबतचा निर्णय घेण्याबाबतचे सर्वाधिकार हे ग्रामपंचायतींना देण्यात आलेले आहेत. त्यामुळे आधी कोरोनामुक्त ग्रामपंचायतींची माहिती घेऊन त्या ग्रामपंचायतींना शाळा सुरू करण्याबाबत ठराव घेण्याच्या सूचना केल्या जातील. ग्रामपंचायतींची तयारी असेल, तरच संबंधित गावांतील ८ वी ते १२ वीपर्यंतच्या शाळा सुरू केल्या जाणार आहेत. शासनाच्या या निर्णयामुळे जिल्ह्यातील ९० हजारांहून अधिक विद्यार्थ्यांना शाळा उघडण्याची प्रतीक्षा लागली आहे.
------------------
एका बाकावर बसणार एकच विद्यार्थी
कोरोनामुक्त ग्रामपंचायतींनी ठराव घेतल्यानंतर ८ वी ते १२ वीच्या शाळा सुरू केल्यास या शाळांमध्ये कडक नियमांचे पालन करावे लागणार आहे. शाळांमध्ये एका बाकावर केवळ एका विद्यार्थ्याला बसण्याची परवानगी असेल. तसेच दोन बाकांमध्ये सहा फुटांचे अंतर ठेवले जाईल. तसेच विद्यार्थ्यांना कोरोनाविषयक नियमांचे पालन करावे लागणार आहे. तसेच त्यांना सतत हात धुवावे लागतील.
------------------
आसन क्षमतेमुळे वर्गाचे विभाजन
कोरोनामुक्त गावांत ८ वी ते १२ वीच्या शाळा सुरू करताना वर्गातील आसन क्षमता कमी करून फिजिकल डिस्टंन्सिंगचे पालन करण्याचे निर्देश दिले आहेत. त्यामुळे एका वर्गात विद्यार्थ्यांची संख्या ५० टक्क्यांहूनही कमी राहण्याची शक्यता असल्याने वर्गाचे विभाजन करावे लागणार असून शिक्षकांना एकाच वर्गासाठी एकाच विषयाच्या दोन किंवा त्यापेक्षा अधिक तासिका दरदिवशी घ्याव्या लागणार आहेत.
------------------
बॉक्स : ८ वी ते १२ वीच्या शाळा - ३६२,
बॉक्स : ८ वी ते १२ वीचे विद्यार्थी - ९९०९५
------------------
८ ते १२ वर्गनिहाय विद्यार्थी
वर्ग - विद्यार्थी
आठवी - २०५००
नववी - २०७००
दहावी - १९७१५
अकरावी - १९००५
बारावी - १८१७५
-------------
कोट : कोरोनामुक्त भागांतील आठवी ते बारावीपर्यंतच्या शाळा सुरू करण्याबाबत शासनाच्या निर्णयाची माहिती आहे. आम्हांला अधिकृत सूचना नाहीत; परंतु, या निर्णयानुसार जिल्ह्यातील कोरोनामुक्त ग्रामपंचायतींची माहिती संकलित करण्याचे काम आमच्या स्तरावर सुरू करण्यात आले आहे.
-रमेश तांगडे,
शिक्षणाधिकारी (माध्यमिक)
जि. प. वाशिम