हे लोकन्यायालय प्रत्यक्ष, तसेच व्हिडिओ कॉलिंगच्या माध्यमातून ऑनलाइन स्वरूपात घेतले जाणार आहे. तरी संबंधित पक्षकारांनी राष्ट्रीय लोकन्यायालयामध्ये सहभागी होऊन आपले वाद सामोपचाराने मिटवावेत, असे आवाहन वाशिम जिल्हा विधि सेवा प्राधिकरणचे अध्यक्ष तथा प्रमुख जिल्हा व सत्र न्यायाधीश शैलजा सावंत, तसेच जिल्हा विधि सेवा प्राधिकरणचे सचिव संजय शिंदे यांनी केले आहे. राष्ट्रीय लोक न्यायालयामध्ये धनादेश अनादर प्रकरणे, बँकेची कर्जवसुली प्रकरणे, कामगारांचे वाद, विद्युत आणि पाणी देयकाबद्दलची आपसात तडजोड करण्याजोगी प्रकरणे वगळून इतर प्रकरणे, आपसात तडजोड करण्याजोगी फौजदारी प्रकरणे, वैवाहिक आणि इतर दिवाणी वाद आदी दाखलपूर्व प्रकरणे, तसेच न्यायालयातील प्रलंबित प्रकरणांमध्ये आपसात तडजोड करण्याजोगे फौजदारी प्रकरणे, धनादेश अनादर प्रकरणे, बँकेची कर्जवसुली प्रकरणे, मोटार अपघात नुकसानभरपाई प्रकरणे, वैवाहिक वाद, कामगारांचे वाद, भू-संपादन प्रकरणे, विद्युत आणि पाणी देयकाबद्दलची आपसात तडजोड करण्याजोगी प्रकरणे वगळून इतर प्रकरणे, सेवाविषयक पगार-भत्ते व सेवानिवृत्तीची फायदेविषयक प्रकरणे, महसूल प्रकरणे यासह भाडे, वाहिवाटीचे हक्क, मनाई हुकुमाचे दावे, विशिष्ट पूर्वबंधकराराचे पूर्तताविषयक वाद (स्पेसिफिक परफॉर्मन्स दावे) आदी दिवाणी प्रकरणे सुनावणीसाठी ठेवण्यात येणार आहेत.
-----------
दाखलपूर्व प्रकरणे
सुनावणीस ठेवण्याचे आवाहन
ज्या पक्षकारांची उपरोक्त संवर्गातील प्रकरणे न्यायालयात प्रलंबित आहेत अथवा प्रलंबित नाहीत आहेत, अशी दाखलपूर्व प्रकरणे राष्ट्रीय लोकन्यायालयामध्ये सुनावणीसाठी ठेवण्याकरिता संबंधित न्यायालय किंवा वाशिम जिल्हा विधि सेवा प्राधिकरण अथवा संबंधित तालुका विधि सेवा समिती यांच्या कार्यालयाशी संपर्क साधावा आणि या राष्ट्रीय लोकन्यायालयामध्ये सहभागी होऊन आपले वाद सामोपचाराने कायमचे मिटवावेत, असे आवाहन वाशिम जिल्हा विधि सेवा प्राधिकरणच्या वतीने करण्यात आले आहे.