वाशिम : राष्ट्रीय संरक्षण प्रबोधिनी अर्थात ‘एनडीए’ची प्रवेश परीक्षा देऊन आता मुलींनाही लष्करात दाखल होता येणार आहे. यासंदर्भातील महत्त्वपूर्ण निर्णय सर्वोच्च न्यायालयाने घेतला आहे. यामुळे ‘एनसीसी’मध्ये दाखल मुलींमधून आनंद व्यक्त होत आहे.
सध्या मुली किंवा महिला चेन्नई येथील ऑफिसर्स ट्रेनिंग अकॅडमी किंवा डेहरादून येथील इंडियन मिल्ट्री अकॅडमी या संस्थांसाठीची प्रवेश परीक्षा देऊन लष्करात दाखल होतात; मात्र मुली, महिलांनी ‘एनडीए’ची परीक्षा देऊन लष्करात दाखल होण्याची तरतूद नव्हती. याविरोधात ॲड. कुश कार्ला यांनी सुप्रीम कोर्टात याचिका दाखल केली. त्यावर १८ ऑगस्ट रोजी न्या. संजय किशन कौल आणि न्या. ऋषिकेश रॉय यांच्या खंडपीठाने निर्णय देत मुलींना ‘एनडीए’ची परीक्षा देण्याचा मार्ग मोकळा केला. त्यामुळे येत्या ५ सप्टेंबर रोजी होऊ घातलेल्या ‘एनडीए’च्या परीक्षेत मुलीही सहभागी होऊ शकणार आहेत.
...........................
काय आहे सर्वोच्च न्यायालयाचा निकाल?
सुप्रीम कोर्टाने १८ ऑगस्ट रोजी दिलेल्या आदेशानुसार आता मुलींनाही राष्ट्रीय संरक्षण प्रबोधिनी (एनडीए) परीक्षा देता येणार आहे. ही परीक्षा येत्या ५ सप्टेंबरला होणार आहे.
या प्रकरणाची पुढील सुनावणी ८ सप्टेंबरला होणार असून निर्णयाचा मोठ्या प्रमाणात प्रसार आणि जाहिरात करण्याचा आदेश कोर्टाने ‘यूपीएससी’ला दिला आहे.
.......................
लष्करात प्रवेशासाठी...
एनडीए’, ‘आयएमए’ आणि ‘ओटीए’ या तीन माध्यमांद्वारे लष्करात प्रवेश करता येतो. त्यातील ‘आयएमए’ आणि ‘ओटीए’च्या माध्यमातून मुलींना लष्करात प्रवेश मिळतो; मात्र ‘एनडीए’तून मुलींना प्रवेश दिला जात नाही. सुप्रीम कोर्टाच्या आदेशाने हा प्रश्नही आता निकाली निघाला आहे.
...............
दोन शहरात एनसीसीच्या ३० मुली
जिल्ह्यातील वाशिम शहरात असलेल्या श्री बाकलीवाल विद्यालयात १५ आणि मंगरूळपीर येथील जिल्हा परिषद शाळेत १५ अशा एकूण ३० मुली सध्या एनसीसीमध्ये दाखल आहेत. त्यातील इच्छुक मुलींना आता ‘एनडीए’ची परीक्षा देऊन लष्करात दाखल होता येणार आहे.
................
लेकींनी मानले न्यायालयाचे आभार !
लष्करात दाखल होण्याचे स्वप्न लहानपणापासूनच बाळगले आहे. त्यामुळेच एनसीसीमध्ये दाखल झाले. सुप्रीम कोर्टाच्या निर्णयाने ‘एनडीए’ची परीक्षा देता येणार असल्याने आनंद झाला आहे.
- श्रुती शिंदे
..........
आतापर्यंत मुलांनाच ‘एनडीए’ची परीक्षा देऊन लष्करामध्ये दाखल होता येत होते. सुप्रीम कोर्टाने महत्त्वपूर्ण निर्णय घेऊन हा अधिकार आता मुलींनाही बहाल केला. त्यामुळे कोर्टाचे मन:पूर्वक आभार !
- सायली कांबळे
..........
शालेय जीवनात ‘एनसीसी’चे प्रशिक्षण पूर्ण झाल्यानंतर मला लष्करातच दाखल व्हायचे आहे. या माध्यमातून देशसेवा करण्याचे स्वप्न आपण बाळगले आहे. सुप्रीम काेर्टाच्या निर्णयाने मोठा आनंद झाला.
- भारती देशमुख