सभामंडपाच्या कामाची चौकशी करा

निवेदनात म्हटले आहे की, सदर सभामंडप लोखंडी शेडने बांधले आहे. त्यामध्ये पूर्ण काम केले नसून काम अर्धवट केले आहे. त्यामध्ये सरपंचांनी अपहार केला असून, त्याची चौकशी करून एक महिन्यात काम पूर्ण करावे व सरपंचांंना पदावरून हटवावे. तीन वर्षांअगोदर जि.प वाशिम येथून जि.प. सभापती पानूबाई जाधव यांच्या निधीतून विहार परिसर मिलिंदनगर येथे ५,५०,००० रुपयांचे सिमेंट काँक्रीटचे सभागृह मंजूर केले; परंतु ३ वर्षे होऊनही सदर सभागृह सिमेंटचे न करता सरपंचांनी सन २०२१ मध्ये टिनाचे पत्रे थातूरमातूर टाकून उभे करून दिले आहे. आजूबाजूला विटाचे बांधकाम न करता व खाली बेड काँक्रीट व टाइल्स किंवा फरशी न टाकता टिनाचे सभामंडप उभे करून कमीत कमी दीड लाख रुपयांपर्यंत काम केले आहे. बाकीचे काम करणे बाकी आहे. ६ महिने झाले आहे तरी सरपंच पुढील काम करीत नाही. विचारले असता आता दुसरे काम मंजूर करून त्यात पुढील कामे करतो असे सांगितले. त्यामुळे याची सखोल चौकशी करून कामाचे इस्टिमेट काय आहे हे पाहून मोक्यावर चौकशी करून पुढील कामे एक महिन्यात करावीत, अन्यथा पंचायत समितीसमोर आंदोलन करण्यात येणार असल्याचे निवेदनात नमूद आहे. निवेदन रिपाइंचे जिल्हाध्यक्ष तेजराव वानखडे यांच्या मार्गदर्शनाखाली देण्यात आले. निवेदनावर रिपाइंचे तालुका अध्यक्ष तुकाराम खडसे, रामकृष्ण पंडित, देवानंद खाडे, विठ्ठल खडसे, देवराव खाडे, संतोष उंदरे, पंजाब बेलखेडे, अनिल भगत, देवानंद वंजारी, अरुण मनवर आदींच्या स्वाक्षऱ्या आहेत.