दुसऱ्या डोसकरिता २६ सप्टेंबरपर्यंत वाढ

समता फाउंडेशन, रिसोड नगर परिषद व जिल्हा परिषद वाशिम यांच्या संयुक्त विद्यमाने रिसोड शहरातील नागरिकांसाठी कोविशिल्ड लसीचा दुसरा डोस देण्याचा कार्यक्रम ११ सप्टेंबरपासून शहरातील पाच लसीकरण केंद्रांवर सुरू आहे. २० सप्टेंबरपर्यंत समता फाउंडेशनने ११ हजार नागरिकांचे दुसऱ्या डोसचे लसीकरण पूर्ण केले होते. अद्याप ६ हजार नागरिकांचे लसीकरण हाेण्याचे बाकी असल्याने २६ सप्टेंबरपर्यंत या कार्यक्रमात वाढ करण्यात आली. शहरातील भारत माध्यमिक शाळा, श्री उत्तमचंदजी बगडिया महाविद्यालय, अल्लामा इक्बाल स्कूल, विश्वालॉन व एमएआयटी निजामपूर या पाच ठिकाणी लसीकरण केंद्रे उभारून दहा दिवसांमध्ये ११ हजार नागरिकांचे विक्रमी लसीकरण केले. महालक्ष्मी व गणपती उत्सवांमुळे रिसोड शहरातील बऱ्याच नागरिकांना समता फाउंडेशनतर्फे सुरू असलेल्या लसीकरण उपक्रमांत २० सप्टेंबरपर्यंत कोविशिल्डची दुसरी लस घेता आली नाही. परिणामी, मागील लसीकरणात पहिली लस घेतलेल्या १७ हजार नागरिकांपैकी आजपर्यंत ११ हजार नागरिकांनी लसीचा दुसरा डोस घेतला असून अद्याप अंदाजे ६ हजार नागरिकांनी लस घेतलेली नाही. या सर्वांचा विचार करून समता फाउंडेशनने लोक आग्रहास्तव लसीकरण मोहीम रविवार, २६ सप्टेंबरपर्यंत आहे. नागरिकांनी लाभ घ्यावा, असे आवाहन समता फाउंडेशनतर्फे करण्यात आले आहे.