मंगरुळपीर : तालुक्यातील जवळपास तीन पिढ्यांचे मनोरंजन व समाज प्रबोधनातही महत्त्वाची भूमिका वठविणारी मंगरुळपीर शहरातील शशीमोहन सिनेमा टॉकीज आता इतिहास जमा झाली आहे. चित्रपटगृहाकडे प्रेक्षकांनी पाठ केल्याने दोन वर्षांपासून ही टॉकीज बंद पडली. यातून पुढे उत्पादन होण्याची अपेक्षाच नसल्याने चित्रपटगृहाच्या मालकांनी इमारतीसह जागेची विक्री केली असून, व्यापारी संकुल निर्मितीसाठी या टॉकीजची इमारत पाडली जात आहे.
मंगरुळपीर शहरात १९५९ मध्ये राठी परिवाराने शहराच्या मध्यवर्ती भागात मुख्य मार्गावर शशीमोहन टॉकीज या नावाने चित्रपटगृहाला सुरुवात केली होती. गत २० वर्षांचा काळ वगळला, तर या चित्रपटगृहाने जवळपास तीन पिढ्यांचे मनोरंजन व त्याच माध्यमातून समाज प्रबोधनही केले. या सिनेमा टॉकीजचे वैभव जिल्हाभरात पसरले होते. तालुक्यासह जिल्हाभरातील हजारो चित्रपटप्रेमींची येथे चित्रपट पाहण्यासाठी अनेकदा गर्दी उसळत असल्याने मार्गावरील वाहतूक ठप्प व्हायची; परंतु याची साधी तक्रारसुद्धा कोण्या नागरिकाने कधी केली नाही. या चित्रपटगृहाने १०५९ ते २०१० पर्यंतच्या पाच दशकांतील हजारो नावाजलेल्या चित्रपटाचा आनंद प्रेक्षकांना दिला; परंतु गत २००१ पासून चित्रपटगृहांकडे प्रेक्षकांनी पाठ करण्यास सुरुवात केली. दूरचित्रवाणी वाहिन्यांवर नवनवे चित्रपट पाहायला मिळू लागले. शिवाय मालिकांनीही चित्रपटगृहाचा प्रेक्षक हिरावून घेतला. परिणामी, चित्रपटगृह चालविणे कठीण झाले. त्यामुळेच मनोरंजनाचे वैभव असलेली मंगरुळपीर येथील शशीमोहन टॉकीजही बंद पडली आणि आता येथे व्यापारी संकुलाच्या निर्मितीची तयारी सुरू असल्याची माहिती आहे.
---------
दूरचित्रवाणी वाहिन्यांसह कोरोनाचा परिणाम
गेल्या २० वर्षांत विविध दूरचित्रवाणी वाहिन्यांचे वाढलेल्या प्रस्थामुळे प्रेक्षकांनी आधीच चित्रपटगृहांकडे पाठ केली होती. त्यात गत दोन वर्षांपासून कोरोना संसर्गामुळे चित्रपटगृहेच बंद असून, अद्यापही चित्रगृहांना परवानगी शासनाने दिलेली नाही. त्यामुळे मंगरुळपीर येथील चित्रपटगृह चालविणेच काय, तर सांभाळणेही मालकांना कठीण झाले होते.
---------------
दहा वर्षांत मोठे आर्थिक नुकसान
गत २० वर्षांपासून पायरसीमुळे नवे चित्रपट घरी पाहण्यास मिळत असताना दूरचित्र वाणी मालिकांचेही प्रस्थ वाढल्याने चित्रपटगृहाकडे प्रेक्षक फिरकेनासे झाले होते. अशा कठीण काळातही मंगरुळपीर येथील चित्रपटगृह चालविण्याचे कार्य मालकांनी केले. त्यामुळे १० वर्षांत शशीमोहन टॉकीजच्या मालकांना मोठे आर्थिक नुकसानही सहन करावे लागले.