लोकमत न्यूज नेटवर्क
मालेगाव : पांदण रस्त्याचा प्रश्न अद्यापही न सुटल्याने अखेर प्रशासनाच्या भरवशावर न राहता पांगरी नवघरे गावातील शेतकऱ्यांनी एकत्र येत पाणंद रस्त्याचे स्वखर्चातून खडीकरण केले.
पांगरी नवघरे परिसरात पाणंद रस्त्यांची कामे केली नसल्याने शेतकऱ्यांना विविध अडचणींना सामोरे जावे लागते. खरीप हंगाम जवळ येत असल्याने पाणंद रस्त्यांची कामे होणे गरजेचे आहे. वारंवार मागणी करूनही पाणंद रस्त्यांचा प्रश्न निकाली निघत नसल्याचे पाहून शेतकऱ्यांनीच यासाठी पुढाकार घेतला आहे. पांगरी नवघरे परिसरातील पाच रस्त्यांपैकी एक रस्ता असलेल्या पाणंद रस्त्याचे खडीकरण हे तेथील सर्व शेतकऱ्यांनी वर्गणी काढून केले. पांदण रस्त्याच्या डागडुजीला सुरुवात करण्यात आली. लोकप्रतिनिधींनी पांदण रस्त्याकरिता ठोस पावले उचलली नसल्याने शेतकऱ्यांमधून रोष व्यक्त होत आहे. आतातरी प्रशासनाने याची दखल घेऊन मदत करावी, अशी अपेक्षा शेतकरी बाळगून आहेत.