दुसरा डोस लसीकरणाकरिता २६ सप्टेंबरपर्यंत वाढ

शहरात ११ ते २० सप्टेंबर दरम्यान विक्रमी १२ हजार नागरिकांना कोविशिल्ड लसीचा दुसरा डोस देण्यात आले. समता फाउंडेशन, रिसोड नगर परिषद व जिल्हा परिषद वाशिम यांच्या संयुक्त विद्यमाने रिसोड शहरातील नागरिकांसाठी कोविशिल्ड लसीचा दुसरा डोस देण्याचा कार्यक्रम ११ सप्टेंबरपासून शहरातील पाच लसीकरण केंद्रांवर सुरू आहे. २० सप्टेंबरपर्यंत समता फाउंडेशनने बारा हजार नागरिकांचे दुसऱ्या डोसचे लसीकरण पूर्ण केले होते. ५ जून ते २७ जून या काळात समता फाउंडेशनच्या वतीने संपूर्ण रिसोड तालुक्यांमध्ये तीस हजार नागरिकांचे पहिल्या डोसचे लसीकरण नि:शुल्क करण्यात आले होते. यामध्ये रिसोड शहरातील १७ हजार नागरिकांचा समावेश होता. या १७ हजार नागरिकांची दुसऱ्या डोसची तारीख ही ११ ते २६ सप्टेंबरदरम्यान येत होती. एवढ्या मोठ्या प्रमाणात नागरिकांचे लसीकरण करणे सरकारी लसीकरण केंद्रावर शक्य नव्हते. ही बाब लक्षात घेऊन समता फाउंडेशनने शहरातील नागरिकांसाठी कोविशिल्ड लसीच्या दुसऱ्या डोसची व्यवस्था केली. शहरातील भारत माध्यमिक शाळा, श्री उत्तमचंदजी बगडिया महाविद्यालय, अल्लामा इक्बाल स्कूल, विश्वालॉन व एमएआयटी निजामपूर या पाच ठिकाणी लसीकरण केंद्रे उभारून दहा दिवसांमध्ये १२ हजार नागरिकांचे विक्रमी लसीकरण केले. महालक्ष्मी व गणपती उत्सवामुळे रिसोड शहरातील बऱ्याच नागरिकांना समता फांउडेशनतर्फे सुरू असलेल्या लसीकरण उपक्रमात २० सप्टेंबरपर्यंत कोविशिल्डची दुसरी लस घेता आली नाही. परिणामी मागील लसीकरणात पहिली लस घेतलेल्या १७ हजार नागरिकांपैकी आजपर्यंत ११ हजार नागरिकांनी लसीचा दुसरा डोस घेतला असून, अद्याप अंदाजे ६ हजार नागरिकांनी लस घेतलेली नाही. या सर्वांचा विचार करून समता फाऊंडेशनने लोकआग्रहास्तव लसीकरण मोहीम रविवार २६ सप्टेंबरपर्यंत श्री उत्तमचंदजी बगडिया महाविदयालय, नगरपरिषद शाळा व एमएआयटी निजामपूर अशा फक्त ३ लसीकरण केंद्रावर लसीकरण ९ ते ६ या वेळेत सुरू ठेवले आहे. या अंतिम संधीचा लाभ रिसोड शहरातील नागरिकांनी घ्यावा व आपले व आपल्या परिवाराचे कोरोनापासून रक्षण करावे, असे आवाहन समता फांउडेशनतर्फे करण्यात आले आहे.