कर्मचा-यांची लेखणी बंद!

वाशिम जिल्हा परिषद लेखा कर्मचा-यांचे आंदोलन; लेखाविषयक कामकाजाचा खोळंबा

वाशिम, दि. १५- सहायक लेखा अधिकार्‍यांना शासकीय कर्मचार्‍यांप्रमाणे राजपत्रित दर्जा देण्यात यावा, यांसह विविध मागण्यांच्या पूर्ततेसाठी जिल्हा परिषद लेखा संवर्गीय कर्मचार्‍यांनी १५ मार्चपासून लेखणी बंद आंदोलन पुकारले आहे. लेखा संवर्गातील सर्व कर्मचारी सहभागी असल्याची माहिती जिल्हा परिषद लेखा कर्मचारी संघटना जिल्हा शाखा वाशिमचे अध्यक्ष रामानंद ढंगारे यांनी दिली. लेखा कर्मचार्‍यांना राज्य शासनाच्या कर्मचार्‍यांप्रमाणे ग्रेड पे वरिष्ठ सहायक लेखा कर्मचार्‍यांना ४00 रुपये व सहायक लेखा अधिकारी यांना १00 रुपये वाढवून मिळावा, ग्रेड पे राज्य शासन कर्मचार्‍यांना ज्या दिनांकापासून मंजूर करण्यात आला, त्या दिनांकापासून मंजूर करण्यात यावा व यात झालेला भेदभाव संपुष्टात आणावा, जिल्हा कोषागार व उ पकोषागार कार्यालयाप्रमाणे गट स्तरावर लेखा विभागाचे कामकाज करण्यात यावे, गट स्तरावर सहायक लेखाधिकारी यांना विशेष वित्तीय अधिकार देण्यात यावे, महाराष्ट्र वित्त व लेखा सेवा वर्ग - ३ ची परीक्षा दरवर्षी नियमित घेणे, जिल्हा परिषद अंतर्गत लेखा कर्मचार्‍यांचे जॉब चार्ट तयार करणे, पंचायत समिती स्तरावर लेखा अधिकारी वर्ग-२ चे पद निर्माण करणे आदी मागण्या शासन स्तरावर करण्यात आल्या आहेत; मात्र अद्यापही सकारात्मक निर्णय न झाल्याने राज्यस्तरावर विविध टप्प्यात आंदोलन केले जात आहे. पहिल्या टप्प्यात १0 ते १४ मार्चदरम्यान काळ्या फिती लावून कामकाज करण्यात आले. दुसर्‍या टप्प्यात १५ मार्चपासून कार्यालयात उपस्थित राहून लेखणी बंद आंदोलनाला सुरुवात केली आहे. बुधवारच्या लेखणी बंद आंदोलनात लेखा संवर्गातील सर्व कर्मचारी सहभागी होते.