‘बर्ड फ्लू’ घाबरू नका, काळजी घ्या !

साधारणत: दोन महिन्यांपूर्वी राज्याच्या काही भागांत ‘बर्ड फ्लू’चे संक्रमण झाले. १५ दिवसांपूर्वी मंगरूळपीर तालुक्यातील नवीन सोनखास येथे बर्ड फ्लूमुळे काही पक्षी मृत्युमुखी पडल्याचे निष्पन्न झाले होते. योग्य त्या प्रतिबंधात्मक उपाययोजना करण्यात आल्याने बर्ड फ्लूचा धोका आता राहिलेला नाही. जिल्ह्यात सध्या कुठेही बर्ड फ्लूचे संक्रमण नसून जिल्ह्यातील पशुपालक, नागरिकांनी कोणत्याही अफवेवर विश्वास ठेवू नये. पोल्ट्री फार्ममधील पक्षी अथवा बदके, कावळे यासारखे पक्षी मृत्युमुखी आढळून आल्यास नागरिकांनी नजीकच्या पशुवैद्यकीय दवाखान्याला तातडीने माहिती द्यावी. कुक्कुटपालकांनी कुक्कुटपालन शेड व परिसरात स्वच्छता राखावी तसेच शेडचे सोडियम हायपोक्लोराईड, धुण्याचा सोडा, चुना लावून निर्जंतुकीकरण करावे. पक्ष्यांचे पिंजरे, त्यांना रोज ज्या भांड्यात खाणे दिले जाते, अशी भांडी रोज पावडरने स्वच्छत धुवावीत. एखादा पक्षी मरण पावला तर त्याला उघड्या हाताने स्पर्श करू नका. त्याबाबत नजीकच्या पशुवैद्यकीय संस्थांना कळवा. पक्ष्यांच्या स्रावासोबत तसेच विष्ठेसोबत संपर्क टाळा. आजारी दिसणाऱ्या, सुस्त पडलेल्या पक्ष्याच्या संपर्कात येऊ नका. पोल्ट्री उत्पादनासोबत काम करताना पाणी व साबणाने हात वारंवार स्वच्छ धुवा. व्यक्तिगत स्वच्छता, परिसर स्वच्छ ठेवा, असे आवाहन डॉ. बोरकर यांनी केले.