दलित वस्ती निधी वाटपात गोंधळ

मालेगाव नगरपंचायतीमधे एकूण १७ वाॅर्ड असून, दलितवस्ती सुधार योजनेअंतर्गत २०१८-१९ मधे २ कोटी ९१ लाख रुपये निधी प्राप्त झाला होता. तसेच २०१९ -२० मध्ये २९ लाख ३० हजार इतका निधी मिळाला होता. या निधीमधून वाॅर्ड क्रमांक ३ मध्ये २०१८-१९ मध्ये ७९९९२५६ रुपये, तर २०१९-२० मध्ये २३२३३२१ रुपये इतका निधी खर्च करण्यात आला . तसेच वाॅर्ड क्रमांक ७ मध्ये ९५५९७९ रुपये, वाॅर्ड क्रमांक ८ मध्ये ७१०५१३४ रुपये तसेच वाॅर्ड क्रमांक ९ मध्ये ५०२५१८ रुपये आणि वाॅर्ड क्रमांक १७ मध्ये १९१११२१ रुपये, असा निधी २०१८-१९ मध्ये खर्च करण्यात आला. हा निधी ज्या वाॅर्डात दलित वस्ती मोठ्या प्रमाणात आहे, त्या वाॅर्ड क्रमांक १३ व १४ मध्ये दिला गेला नाही. मात्र, वॉर्ड क्रमांक १७, ७ व ९ मध्ये दलित वस्ती नसतानासुद्धा मोठ्या प्रमाणात निधी खर्च करण्यात आला. हा दलित बांधवांवर अन्याय असून, याची सखोल चौकशी होणे गरजेचे आहे. त्यावेळी सत्तेत असणाऱ्या पदाधिकारी व अधिकाऱ्यांनी आपल्या पदाचा दुरुपयोग करून हा अनियमितपणा व भ्रष्टाचार केल्याचा आरोप पखाले यांनी केला आहे . वार्ड क्रमांक १३ व ४ मधे ७५ टक्क्यांपेक्षाही अधिक दलित बांधवांची वस्ती असल्यामुळे विकास कामे न झाल्यामुळे त्यांच्यात प्रचंड रोष आहे. याबाबत चौकशी करून दोषींविरुद्ध कारवाई करावी, अन्यथा वाॅर्ड क्रमांक १३ मधील कार्यकर्त्यांसह उपोषण करण्यात येईल, असा इशाराही निवेदनातून दिला आहे.